Երեկ ԱԺ ՀԱԿ խմբակցության ղեկավար Լևոն Զուրաբյանի հետ լրագրողների հանդիպմանը լրագրողներից մեկի հարցին, թե՝ «նախկին խորհրդարաններում պարբերաբար ձեռնամարտի տեսարանների ենք ականատես եղել, հաշվի առնելով, որ ուժեղ տղերք կան, կռված տղերք կան, բախումների պատրա՞ստ եք», Լևոն Զուրաբյանը պատասխանեց.
«Ես կարատե պարապել եմ»: Լևոն Զուրաբյանին պատանեկության և երիտասարդության տարիներին հիշող մի անհատ «Առաջին լրատվական» էր զանգահարել և պատմում էր, որ չի կարող պնդել կամ հաստատել՝ Լևոն Զուրաբյանը կարատե պարապե՞լ է, թե՞ ոչ, բայց որ հաճախել է «Նարեկ» արական երգչախումբ՝ դա հաստատ է:
Հաշվի առնելով Լևոն Զուրաբյանի նուրբ ձայնը՝ կարելի է ենթադրել, որ Լևոն Զուրաբյանը առաջին տենոր է: «Նարեկ» արական երգչախումբը Հայաստանի կամերային երաժշտության տանն էր գործում՝ խմբավար և երգիչ Մկրտիչ Մկրտչյանի խմբավարությամբ: Ըստ մեզ հեռաձայնողի՝ Զուրաբյանը մինչև 1994 թվականը հաճախել է այդ հոգևոր երգչախումբ:
