Մի խումբ ազդեցիկ սենատորներ ԱՄՆ Կոնգրես են մտցրել Ռուսաստանի հետ առևտրային հարաբերությունների նորմալացման օրինագիծը, որը ներառում է Ջեքսոն-Վենիկի ուղղումը չեղյալ հայտարարելու հարցը: Այս մասին գրում է The Financial Times-ը:
Օրինագծի հեղինակը դեմոկրատ Մաքս Բոքուսն է, սակայն դրա մշակմանն անմիջական առնչություն են ունեցել հանրապետական կուսակցության ներկայացուցիչները:
Բոքուսի խոսքով` տվյալ ուղղումն իր դերը կատարել է Սառը պատերազմի տարիներին, ու ներկայում հանդիսանում է «այլ դարաշրջանի մնացուկ»: «Այն կանգնած է մեր ֆերմերների ու գործարարների ճանապարհին, որոնք նոր աշխատատեղ ստեղծելու հնարավորություններ են որոնում»,- հավելել է նա:
Միևնույն ժամանակ, Բոքուսն առաջարկում է «օրինագիծը «կապել Մագնիտսկու գործի» հետ, որում իշխանություններն իրավունք կունենան սառեցնել ռուս չինովնիկների ակտիվները, որոնք կասկածվում են մարդու իրավունքների խախտման մեջ:
Այդ օրինագիծն արդեն հաստատվել է Կոնգրեսի արտաքին գործերի կոմիտեի կողմից:
ԱՄՆ ադմինիստրացիան աջակցում է օրենսդրության մեջ փոփոխություններին, քանի որ հակառակ պարագայում ԱՄՆ-ի ընկերությունները չեն կարողանա առավելագույն օգուտ ստանալ Ռուսաստանի` ԱՀԿ-ին անդամակցության դեպքում: Օրենքն աջակցություն է ստանում նաև կորպորատիվ շրջանակներում:
Ջեքսոն-Վենիկի ուղղումը ԱՄՆ-ն ընդունել է 1974թ.` սահմանափակելու առևտուրը մի շարք երկրների հետ, որոնք խոչընդոտում են իրենց քաղաքացիների տեղաշարժը: Առաջին հերթին դա վերաբերել է ԽՍՀՄ-ին: