ԱՄՆ-ը կամ ՌԴ-ն չեն կառավարում, և որոշումներ չեն ընդունում ո՛չ Պուտինը, ո՛չ Օբաման: Ինչպես այսօր լրագրողների հետ հանդիպման ժամանակ հայտարարեց Գլենդել քաղաքի «Հայտուն» հեռուստածրագրի տնօրեն Համլետ Ներսիսյանը, կա մի ուժ, որին ոչ ոք չի ճանաչում, մեզ տեսանելի չէ, բայց հենց նա է կառավարում աշխարհը:
Ըստ նրա` կարող է իրադրություն փոխվել, և ԱՄՆ-ը վերհիշի ԱՄՆ նախագահ Վուդրո Վիլսոնի ստորագրած և միջազգայնորեն հաստատված Իրավարար վճիռ-քարտեզը, Թուրքիայից կարող են վերցնել Արևմտյան Հայաստանի հողերը, և Հայաստանը պետք է աշխատի, որ այդ ժամանակ հողերը հասնեն մեզ, ոչ թե տրվեն այլ երկրների:
«Հայերը, բացի մի քանի հոգուց, քնած են` սերիալ են նայում ու քնում»,- ասաց Հ. Ներսիսյանը:
Նրա խոսքով՝ ԱՄՆ-ում Այզենհաուերից հետո ընտրություններ չեն եղել, նշանակում են նախագահին. «Մարդիկ չեն ընտրում նախագահի, այլ ընտրում են ընտրողներին: Հայ համայնքն ընկած է երեք քարի արանքը` ընտրում են դեմոկրատներին` խաբվում են, ընտրում են հանրապետականներին` խաբվում են»:
Բանախոսը նշեց, որ դրսում ապրողներն ավելի շատ ուշադրություն են դարձնում ապագային, քան ներկային: Չկա մի երկիր, որ առանց վայրիվերումների պետություն կառուցի:
«Մենք՝ հայերս, 2000 տարի կռիվ ենք տալիս մեր գոյության համար, բայց ժամանակն է, որ իրար դեմ կռիվ չտանք, այլ որոշենք, թե ուր ենք գնում: Ուղեցույց է պետք: Տնտեսական հարցերով միշտ խնդիրներ լինելու են: Բայց արդյոք ո՞ւր ենք գնում: Ժողովրդի սոցիալական խնդիրները մի գազան է, որ բոլորին է երևում»,- ասաց Հ. Ներսիսյանը` հավելելով, որ հնարավոր չէ մի երկրի հաջողակ գործարարը գա մի անապահով երկիր ու ներդրումներ անի:
«Սփյուռքի հավատքը կորել է, այն կվերականգնվի այն ժամանակ, երբ ՀՀ-ն կդառնա ապահով ու վստահելի գործընկեր: Շատերը եկան, դրամը կորցրեցին. բոլորը դա գիտեն»,- ամփոփեց Հ. Ներսիսյանը:
