«Առաջին լրատվական»-ը Ահարոն Ադիբեկյանից հետաքրքրվեց, թե Ռոբերտ Քոչարյանի բացասական վարկանիշը (ընդամենը, ըստ Ադիբեկյանի, 2.4 տոկոս) պայմանավորված է նրանով, որ Լեռնային Ղարաբաղի հիմնահարցը հետին պլա՞ն է մղվել, թե՞ նրանով, որ նա 2008 թ. մարտի 1-ին հրաման տվեց Երևանի կենտրոնում գնդակահարել խաղաղ ցույց անող տասը քաղաքացիների: Ահարոն Ադիբեկյանն ասաց, որ մարդիկ գնահատում են քաղաքական գործչին ոչ թե նրանով, թե նա ինչ է արել, այլ, թե ինչ չի արել:
«Արածը մոռացվում է»,- ասաց Ադիբեկյանը: «Վատն ու բացասակա՞նն էլ»,- հարցրինք Ադիբեկյանին: «Ամեն ինչն է մոռացվում: Այն, ինչ կարող էր անել, չի արել: Սա է ամբողջ խնդիրը: Իսկ այն ընտանիքները, որ կորուստ են ունեցել մարտի 1-ին, ընդդիմությունը, որը վիրավորված է, պետք է բախման պատճառը գտնեն` մեղավորը Քոչարյա՞նն էր, թե՞ Փաշինյանը»,- մեր հարցին այսպես արձագանքեց Ադիբեկյանը: Հետո, մանրամասնելով իր տեսակետը, հարց ուղղեց. «Ի՞նչ է նշանակում ըմբոստություն, կանոններին չենթարկվել: Կրակո՞ղն է մեղավոր, թե՞ կրակվողը: Առիթն ո՞վ է տվել, ո՞վ էր այդ մարդկանց բերել»: Մեր դիտարկմանը, որ կրակելու հրաման տվողը եղել է իշխանությունը, Ադիբեկյանն արձագանքեց, որ կա ընդդիմության մի քանի եղանակ: Եվ այդ «եղանակ»-ի մեջ հիշատակեց խանութ վառողներին: