Իսրայելի Կնեսետը հունիսի 12-ին հատուկ նիստում քննարկել է 1915 թ. Օմանյան կայսրությունում իրականացված Հայոց ցեղասպանության ճանաչման հարցը:
Ինչպես հաղորդում է The Times of Israel-ը, Իսիրայելի խորհրդարանը նախկինում զերծ էր մնում այդ թեմայով հանրային քննարկումներից, քանի որ չէր ցանկանում խնդիրներ ունենալ Թուրքիայի կառավարության հետ: Հարցի քննարկումը,- գրում է պարբերականը,- համընկնում է Թուրքիայի և Իսրայելի միջև հարաբերությունների վատթարացման հետ:
Կնեսետի խոսնակ Ռեուվեն Ռիվլինը, սակայն, ելույթ ունենալով նիստին, նշել է, որ թեմայի քննարկումը ոչ մի կապ չունի Իսրայելի և Թուրքիայի միջև լարված հարաբերությունների հետ: «Որպես հրեաներ և որպես մարդ արարածներ՝ մենք չենք կարող արհամարհել այդ խնդիրը և չպետք է հետ քաշվենք բարոյականությանը մեր հակվածությունից: Որպես երկիր, որը պայքարում է միջազգային թատերաբեմում Հոլոքոստի մերժման դեմ, մենք չենք կարող ժխտել մեկ այլ ժողովրդի ողբերգությունը»,- ասել է նա:
Ինչպես հաղորդում է իսրայելական IzRus գործակալությունը, իսրայելցի պատգամավոր Դով Հանինը, որը հանդես է գալիս ցեղասպանության ճանաչման օգտին, հունիսի 12-ին տեղի ունեցած քննարկումներում հայտարարել է, որ կարելի է վիճել թվերի և անվտանգուլթան հարցերի շուրջ, սակայն սիրիական անապարտ քշված հարյուր հազարավոր հայերի մահը փաստ է: Նա նաև հիշեցրել է, որ ժամանակին Ադոլֆ ՀԻտլերը որոշեց իրականցնել Հոլոքոստը, քանզի համոզված էր, որ ինչպես հայերի դեպքում, դրա մասին նույնպես ոչ ոք չի հիշի:
2011 թ. դեկտմբերին Կնեսետի կրթության և գիտության հարցերով հանձնաժողովը առաջին անգամ քննարկեց Ցեղասպանության ճանաչման հարցը:
Հիշեցնենք. ավելի վաղ իսրայելական Haaretz թերթը հայտնում էր, որ այդ քննարկումը չի սահմանափակվի միայն մեկ լիագումար նիստով, և Ցեղասպանության թեման կբարձրացվի նաև Կնեսետի հանձնաժողովներց մեկում: Թերթի տվյալներով՝ քննարկումը չի նշանակի Ցեղասպանության փաստի ճանաչում, այլ ավելի շուտ այն յուրօրինակ դեմարշ կլինի Թուրքիայի նկատմամբ:
Հիշեցնենք, որ անցյալ տարվա դեկտեմբերին Հայոց ցեղասպանությանը նվիրված Կնեսետի նիստում ներկա պատգամավորների մեծ մասը, այդ թվում՝ Կնեսետի խոսնակը կոչ արեցին Իսրայելի խորհրդարանին ճանաչել Հայոց ցեղասպանությունը: Սակայն արդեն 2012 թ. փետրվարին Իսրայելի արտգործնախարար Ավիգադոր Լիբերմանը Ցեղասպանության ճանաչմանը դեմ հանդես եկավ:
