DIY-ը կրկին կենդանի է. հունիսի 11-16-ը մի շարք հանրային միջոցառումներ են կազմակերպվում արդեն իսկ վերանորոգված DIY ակումբում: «Սպիտակ ազատություն» խորագրի ներքո կազմակերպվող միջոցառումների շարքում են ֆիլմերի ցուցադրություններ, հանրային քննարկումներ, ուսումնասիրությունների քննարկումներ, գրական երեկոներ: Այս մասին «Առաջին լրատվական»-ի հետ զրույցում տեղեկացրեց Լալա Ասլիկյանը:
Նա հստակեցրեց, որ DIY-ն ի սկզբանե, բացի ակումբ լինելուց, «եղել է ազատ մտածողների համար մի տեղ»: Ակտիվիստի խոսքերով՝ այստեղ կազմակերպվել են կինոդիտումներ, քննարկումներ, ցուցադրություններ և այլն: «Հիմա մի քանի արվեստագետներ, ազատ մտածողներ ուզում են ցույց տալ սրանով, որ մարդու ազատությունը, ազատ միտքը սահմանափակել չի լինի: Ակումբն ամբողջովին վերանորոգվել է, սպիտակ է ներկվել»,- մանրամասնեց Լալա Ասլիկյանը՝ սպիտակ ներկի կիրառությունը բացատրելով նրանով, որ երկու ֆրանսիացի, երբ տեսել են ֆաշիստական սվաստիկաները, անպարկեշտ բառերը DIY–ի պատերի վրա, երկար-բարակ չեն մտածել, վերցրել են սպիտակ ներկը և ներկել:
Ըստ Լալա Ասլիկյանի՝ դա է պատճառը, որ շաբաթն անվանվեց «սպիտակ ազատություն»:
Հիշեցնենք, որ վաղն ակումբում 19:00-ին տեղի կունենա Գագիկ Ղազարեի, Շագա Յուզբաշյանի «Մեկ կադր, մեկ րոպե» մրցանակ ստացած ֆիլմի ցուցադրությունը: Հունիսի 14-ին ժամը 21:00-ին PINCET՝ պանկ էլեկտրո-աղջիկների ռոք խումբը կնշի հարվածային գործիքների նվագող Արմինե Նյուսկ Ղազարյանի ծնունդը: Իսկ հունիսի 15-ին ժամը 18:00-ին Վահան Իշխանյանը կներկայացնի իր ուսումնասիրությունը՝ «Հայախոս մուսուլման համշենցիները» թեմայով:
