Նախկին նախադեպերի համեմատ «Փակ շուկայի» հանձնաժողովի եզրահանգումը հսկայական քայլ է: Այսօր «Առաջին լրատվական»-ի հետ զրույցում այս մասին ասաց «Փրկենք Փակ շուկան» քաղաքացիական նախաձեռնության անդամ, ճարտարապետ, քաղաքաշինարար Սարհատ Պետրոսյանն` անդրադառնալով «Փակ շուկա»-ում տեղի ունեցածի վերաբերյալ ուսումնասիրություն կատարելու նպատակով ՀՀ մշակույթի նախարարության և Երևանի քաղաքապետարանի համատեղ ջանքերով ստեղծված մասնագիտական հանձնաժողովի եզրակացությանը:
Սարհատ Պետրոսյանը նշեց, որ նույնիսկ այն, որ բարի են եղել և հանձնաժողով են ստեղծել, լավ նախադեպ է: «Ճիշտ է, նման եզրահանգումը ցանկալի չէ, ամենալավ լուծումը չէ, բայց այն, որ գոնե հանձնաժողով ստեղծվեց, նախկինի համեմատ հսկայական քայլ է»,- նկատեց Սարհատ Պետրոսյանը:
Հիշեցնենք, որ ձևավորված մասնագիտական հանձնաժողովը որոշում է կայացրել, որ 2012 թ. մայիսի 27-ին տեղի է ունեցել հիմնական կամարների և դրանց կապող կոնստրուկտիվ համակարգի փլուզում մինչև սեյսմիկ կարը: Չնայած որ աշխատանքները դադարեցված են՝ ներսում տարվող շինաղբի մաքրման աշխատանքները բերել են վիճակի վատթարացման: Ելնելով վերը շարադրվածից՝ հանձնաժողովն առաջարկել է՝
1. Հուշարձանի պահպանված մասի կայունությունն ապահովելու նպատակով եռօրյա ժամկետում՝
– լրամշակել ստորգետնյա ավտոկայանատեղի հիմքերը, պարփակող և կրող համակարգը, անցկացնել փորձաքննություն,
– կանգուն մնացած հատվածի թաղածածկույթի սեյսմիկ կարին հարող երկու թռիչքների ներքո անհապաղ իրականացնել մոնտաժային փայտամած հենարանների համակարգ, այդ հատվածի բեռնաթափման նպատակով:
2. «Երևանի թիվ 1 շուկա» ՍՊԸ-ին սեղմ ժամկետում ՀՀ մշակույթի նախարարության քննարկմանը ներկայացնել հուշարձանի վերականգնման, վերակառուցման նոր էսքիզային նախագիծը՝ պահպանելով հուշարձանի արտաքին և ներքին հորինվածքի գեղարվեստական ճարտարապետական և ծավալատարածական լուծումները:
Կատարել մանրամասն երկրաբանական, հիդրոերկրաբանական և երկրաֆիզիկական ուսումնասիրություններ, այդ թվում՝ տարածքում առկա ջրային հոսքի պատճառները պարզելու նպատակով:
3. ՀՀ մշակույթի նախարարության կողմից համաձայնեցված էսքիզային նախագիծը ներկայացնել Երևանի քաղաքապետարան՝ քաղաքաշինական խորհրդի ճարտարապետական և ինժեներական հանձնաժողովների քննարկմանը:
4. ՀՀ մշակույթի նախարարության և Երևանի քաղաքապետարանի կողմից համաձայնեցված էսքիզային նախագծի հիման վրա սահմանված կարգով մշակել աշխատանքային նախագծի փաթեթը՝ առաջնահերթությունը տալով կառույցի պահպանված մասի կոնստրուկտիվ համակարգի կայունության և հուսալիության ապահովման աշխատանքներին:
