NetJets ավիաընկերությունը, որը պատկանում է միլիարդատեր Ուորեն Բաֆեթի Berkshire Hathaway ներդրումային ֆոնդին, ամերիկյան Cessna և կանադական Bombardier ընկերություններից 425 օդանավ կգնի: Գործարքի արժեքը կազմում է 9,6 մլրդ դոլար: Այս մասին ասված է ավիափոխադրողի մամլո հաղորդագրությունում:
NetJets-ը ծրագրում է Bombardier-ի հետ իրականացնել Challenger 300 Series օդանավերի գնում, որից 75-ը՝ օպցիոն պայմանագրով, 125-ը՝ կոշտ պատվերով, ինչպես նաև Challenger 605 օդանավերի 25 օպցիոն և 50 կոշտ պատվերով գնում: Օդանավերը պատվիրատուին կհասնեն համապատասխանաբար 2014 և 2015 թվականներին: Ավիաընկերությունը 25 օպցիոն և 125 կոշտ պատվեր է հղել նաև Cessna Citation Latitudes ընկերությանը՝ 2016-ին մատակարարելու համար:
Օդանավերի գնումը 725 օդանավից բաղկացած ավիապարկի թարմացման 10-ամյա պլանի մի մասն է:
2011-ի մարտին NetJets-ն ու Bombardier-ը կնքել էին 6,7 մլրդ դոլարի գործարք: 70 օդանավերի օպցիոն պայմանագիրն ու 50 օդանավերի կոշտ պատվերը խոշորագույնն էր դարձել կանադական արտադրողի պատմության մեջ: Այդ գործարքի առաջին մատակարարումները նախատեսված են 2012-ի չորրորդ եռամսյակում: Բացի այդ՝ 2010-ի հոկտեմբերին Բաֆեթի ավիաընկերությունը բրազիլական Embraer-ից 125 օդանավ էր պատվիրել:
Օպցիոն պայմանագիրը երկու կողմերի միջև համաձայնություն է, ըստ որի`օպցիոնի գնորդը որոշակի պարգևավճարի դիմաց իրավունք է ստանում (առանց պարտավորության) հետագայում նախապես սահմանված գնով և ժամկետում օպցիոն վաճառողից գնել կամ նրան վաճառել ապրանքը՝ պայմանագրի հիմքում ընկած արժույթով: Օպցիոն պայմանագիրը թույլ է տալիս ի չիք դարձնել փոխարժեքի տատանումների հետ կապված ռիսկերը: