Ադրբեջանական APA լրատվական գործակալության փոխանցմամբ՝ Ադրբեջանի Միլլի մեջլիսը (խորհրդարան) այսօր տեղի ունեցած արտահերթ նիստում ընդունել է «Ադրբեջանի Հանրապետության նախկին նախագահի ու նրա ընտանիքի անդամների մասին» սահմանադրական օրենքը:
Այս օրենքը տարածվելու է այն անձանց վրա, ովքեր նախկինում զբաղեցրել են նախագահի պաշտոնը՝ բացառությամբ Սահմանադրության 107-րդ հոդվածի հիման վրա այդ պաշտոնից հեռացվածների: Եվ քանի որ Ադրբեջանում չեն գրանցվել այդպիսի նախադեպեր, ուստիև այս օրենքը տարածվելու է նախկին Ադրբեջանի նախագահ հանդիսացած բոլոր անձանց վրա:
Նոր օրինագիծը բաղկացած է 12 կետից: Օրինագծով մի շարք արտոնություններ են տրվում նախկին նախագահներին ու նրանց ընտանիքի անդամներին (մինչև 18 տարեկան երեխաներին): Օրինագծով նախկին նախագահի թոշակը հավասարեցվում է նախագահի պաշտոնում գտնվող անձի ամսական աշխատավարձի 50 տոկոսին: Սահմանադրության 107-րդ հոդվածի համաձայն՝ իմփիչմենթի հետևանքով զբաղեցրած պաշտոնից հեռացված նախկին նախագահը չի կարող ստանալ օրենքով նախատեսվածի չափ թոշակ:
Թոշակը և այլ գումարները նախկին նախագահին պետք է վճարվեն նախագահական պաշտոնին նրա հրաժեշտ տալուց մինչև մահկանացուն կնքելը: Նախկին նախագահի մահվան դեպքում վճարումները հատկացվելու են նրա կնոջը՝ մինչև մահ և երեխաներին՝ մինչև 18 տարեկանը: Նախկին նախագահներին հատկացվող թոշակներն ու նպաստներն ազատված են եկամտահարկից:
Պետծառայողների համար սահմանված բժշկական ապահովագրման դրույթները տարածվելու են նաև նախկին նախագահի ու նրա ընտանիքի անդամների վրա: Նոր օրինագծով նախկին նախագահին հատկացվում է թիկնազոր՝ բաղկացած 3 անձից, 1 վարորդ, 1 ծառայողական ավտոմեքենա:
Նախկին նախագահը չի կարող ենթարկվել վարչական և քրեական պատասխանատվության այն գործողությունների համար, որոնք նա գործել է մինչև նախագահ ընտրվելը կամ նախագահության ժամանակ: Նույնը վերաբերում է նաև նրա կնոջը: Նրանց չեն կարող անձնական խուզարկման ենթարկել, նրանց նկատմամբ հետախուզում հայտարարել, սակայն նրանք կարող են ձերբակալվել հանցանքի վայրում, բայց դա պետք է տեղի ունենա միայն գլխավոր դատախազի համաձայնության դեպքում: