Նորվեգացի ահաբեկիչ Անդերս Բրեյվիկին ստուգած հոգեբաններից մեկը նրան համեմատել է «Գառնուկների լռությունը» գեղարվեստական ֆիլմի հերոսի՝ սերիական մարդասպան և մարդակեր Հաննիբալ Լեքթերի հետ: Ինչպես հաղորդում է Agence France-Presse-ը, փորձագետ հոգեբույժ Էյրիկ Յոհաննեսենը մեղադրյալի հետ զրուցել է ընդհանուր առմամբ 26 ժամ: Ավելի վաղ նա ցուցմունք էր տվել որպես պաշտպանող կողմի վկա:
Նրա խոսքերով՝ Բրեյվիկի հետ հանդիպումը կարծես թե հանդիպում լիներ Հաննիբալ Լեքթերի հետ: Բժիշկը նշել է, որ մեղադրյալը միանգամայն մեղսունակ է, որը լիովին պատասխանատու է այդ գործողությունների համար:
«Դատելով նրա գաղափարախոսությունից՝ չեմ կարծում, թե նրան կարելի է բուժել թերապիայի կամ դեղամիջոցների օգնությամբ: Նա ստեղծել է մի կերպար, որպեսզի համոզի մյուս աջ ծայրահեղականներին և ֆաշիստներին՝ հետևել իր օրինակին, կերպար, որը չի համապատասխանում նրա իրական կերպարին: Բայց հոգեկան շեղումներ նա չունի»,- ասել է հոգեբանը:
Ավելի վաղ հաղորդվում էր, որ համաձայն հոգեբանների նոր եզրակացության՝ նորվեգացի ահաբեկիչը տառապում է մի շարք հոգեկան հիվանդություններով: Փորձագետների կարծիքով՝ մեղադրյալը տառապում է Ասպերգերի համախտանիշով, որն իրենից ներկայացնում է աուտիզմի թեթև տեսակ: Բացի այդ, նրա մոտ հատնաբերվել է Տուրետի համախտանիշ՝ գենետիկորեն պայմանավորված կենտրոնական նյարդային համակարգի խանգարում:
Ինքը՝ Բրեյվիկը, ապշած է եղել նման եզրակացություն տեսնելով և այն համարել է «վիրավորական» և «ծիծաղելի»:
Բրեյվիկի դատավարությունը սկսվել է 2012 թ. ապրիլի 16-ին: Նրա դատավճիռը կհրապարակվի 2012 թ. հուլիս-օգոստոսին: Բրեյվիկը մեղադրվում է 2011 թ. հուլիսի 22-ին Նորվեգիայի մայրաքաղաք Օսլոյում և Ուտոյա կղզում 77 մարդու սպանության մեջ: Մեղադրյալն ընդունում է, որ սպանություններն ինքն է կատարել, սակայն իրեն մեղավոր չի ճանաչում:
