Չնայած Հայաստանն ու Իռլանդիան աշխարհագրորեն միմյանց մոտ չեն, սակայն երկու երկրների միջև հարաբերությունները բավական ամուր են: Այսօր կայացած մամուլի ասուլիսի ժամանակ այս մասին ասաց ՀՀ արտգործնախարար Էդվարդ Նալբանդյանը` Իռլանդիայի Հանրապետության փոխվարչապետ և ԱԳ նախարար Էեմոն Գիլմորի հետ համատեղ մամուլի ասուլիսի ժամանակ:
Նրա խոսքով՝ Հայաստանը կարևորում է Իռլանդիայի հետ հարաբերությունների սերտացումը: «Հայաստանն աջակցել է ԵԱՀԿ-ում Իռլանդիայի նախագահությունը և աջակցելու է նրա` ԵԱՀԿ-ն առավել կենսունակ կառույց դարձնելուն ուղղված քայլերը»,-ասաց նախարարը:
Էդվարդ Նալբանդյանի խոսքով՝ ինքը Իռլանդիայի ԱԳ նախարարին ներկայացրել է ԼՂ հակամարտության շուրջ բանակցությունների ներկայիս փուլը:
«Մենք համամիտ ենք, որ խաղաղ կարգավորման այլընտրանք գոյություն չունի: Հայաստանը բազմիցս կողմ է արտահայտվել խաղաղ կարգավորմանը, ինչը համահունչ է միջազգային հանրության տեսակետին»,- ասաց նա:
Լրագրողներից մեկի հարցին`է ինչպե՞ս է վերաբերվում Թուրքիայի` ԼՂ հակամարտության վերաբերյալ ունեցած դիրքորոշմանն ու Ադրբեջանին սատարելու անթաքույց վարքին, ՀՀ ԱԳ նախարարը նկատեց, որ Թուրքիայի ԱԳ նախարար Ահմեդ Դավութօղլուի հայտարարություններից ռասիստական հոտ է գալիս, ինչն էլ նպաստում է ադրբեջանական կողմի նոր սադրանքներին:
«Թուրքական կողմը փորձում է ադրբեջանցիների մեղքը բարդել այլոց վրա` ձևացնելով, թե չի հասկանում` ում միջոցով հնարավորություն չեղավ Կազանում միասնական կարծիքի հանգել: Ավելին, Թուրքիան ոչ միայն չեզոք չէ, այլև խոչընդոտում է բանակցային գործընթացին»,- ասաց նախարարը:
Անդրադառնալով շփման գծում տեղի ունեցող միջադեպերի քննության հարցին` Էդվարդ Նալբանդյանը նկատեց, որ Հայաստանը կողմ է նման մեխանիզմի ստեղծմանը և հավատարիմ է իր այդ տեսակետին` հակառակ Ադրբեջանի, ով սովոր է մշտապես հրաժարվել իր խոստումներից:
