1951թ. այս օրը ծնվեց հայ հասարակական-քաղաքական գործիչ, ՀՀ վարչապետ (2000-2007թթ.), ՀՀԿ նախագահ Անդրանիկ Մարգարյանը:
1967-1972թթ. սովորել է Երևանի պոլիտեխնիկական ինստիտուտի տեխնիկական կիբեռնետիկայի ֆակուլտետում, ստացել հաշվիչ մեքենաների ինժեների որակավորում։ 1972-1974թթ. աշխատել է Գազի արդյունաբերության համամիութենական գիտահետազոտական ինստիտուտի Երևանի մասնաճյուղում` որպես գիտաշխատող, ավագ ինժեներ:
1977-1978-ին աշխատել է Հայաստանի էներգետիկայի գիտահետազոտական ինստիտուտում` որպես գլխավոր ճարտարագետ, 1978-1979-ին` Էլեկտրատեխնիկական գործարանի էլեկտրոնային հաշվիչ մեքենաների բաժնի պետ, 1979-1990-ին` Առևտրի նախարարության հանրապետական ինֆորմացիոն հաշվողական կենտրոնի էլեկտրոնիկայի բաժնի վարիչ, 1990-1994-ին` Հատուկ ծրագրերի պետական վարչության ինֆորմացիոն բաժնի ղեկավար, իսկ 1994-1995-ին` Հայաստանի պետական ճարտարագիտական համալսարանի կրտսեր գիտաշխատող:
1995-1999թթ. Անդրանիկ Մարգարյանը ՀՀ ԱԺ առաջին գումարման պատգամավոր էր, եղել է «Միասնություն» խմբակցության ղեկավարը, 2000-2007թթ.` ՀՀ վարչապետ։
Քաղաքական կյանքի մեջ է ընդգրկվել դեռ 1965-ից։ 1968-ից եղել է խորհրդային տարիներին ընդհատակյա գործող Ազգային միացյալ կուսակցության անդամ, 1973-ից` ԱՄԿ խորհրդի անդամ։ 1974-ին ձերբակալվել է և դատապարտվել երկամյա բանտարկության` խորհրդային վարչակարգի դեմ պայքարելու մեղադրանքով։ 1992թ. անկախ Հայաստանում դառնում է երկրի առաջին գրանցված կուսակցության անդամ, որի խորհրդի նախագահն է 1993-ից մինչ մահը։
1993-1997 և 1998-2005թթ. ՀՀԿ խորհրդի նախագահն էր։ 1997-1998-ին եղել է ՀՀԿ նախագահ, 2005-ին դարձյալ ընտրվել է ՀՀԿ նախագահ, 1998-ից Երկրապահ կամավորական միության անդամ էր, այնուհետև` ԵԿՄ վարչության անդամ։
ՀՀ նախագահի հրամանագրով պարգևատրվել է «Սուրբ Մեսրոպ Մաշտոց» շքանշանով։ Արժանացել է ՀՀ ՊՆ «Վազգեն Սարգսյան», ՀՀ ՊՆ «Գարեգին Նժդեհ» մեդալներին:
Ամուսնացած էր, ուներ երկու դուստր, մեկ որդի:
Մահացել է 2007թ. մարտի 25-ին Երևանում: