Բուհական կրթության կառավարության բանաձևն է՝ «Հնարավորինս հեշտ ընդունելություն, հնարավորինս դժվար պետական ավարտական քննություն»: Այսօր ԵՊՀ Ֆիզկուլտուրայի ամբիոնի քննակենտրոնում «Մաթեմատիկա» առարկայի քննությանը ներկա ԿԳ նախարար Արմեն Աշոտյանը խոսեց ընդունելության միասնական քննությունների, այս տարի գրանցված առավելությունների շուրջ:
Նախարարը տեղեկացրեց, որ անցյալ տարի հակակոռուպցիոն ծրագրի շրջանակներում առաջարկել են, որպեսզի ընդունելության քննություններն անցկացվեն շտեմարանային եղանակով: Երկու տարի անընդմեջ վերլուծելով մամուլը` նախարարությունում նկատել են, որ քննադատության 95%-ը վերաբերում է թեստերի որակին, բովանդակությանը, ծրագրին համապատասխանությանը կամ հակառակը: Ըստ նախարարի` հետքննական քննարկումների թոհուբոհը պտտվում էր թեստերի որակի շուրջ, հատկապես` հայոց լեզու և մաթեմատիկա առարկայից: Արմեն Աշոտյանը նաև նկատեց, որ շատ քիչ էին հոդվածները, որոնք վերաբերում էին կազմակերպական բնույթի խնդիրներին:
«Այս տարի երկու հիմնական առարկաների քննություններն իրականացվում են շտեմարանային եղանակով: Անցավ «Հայոց լեզու և հայ գրականություն» առարկայի միասնական քննությունը, և մենք գրեթե ոչ մի դժգոհություն չունեցանք: Քննություններին անկանխատեսելիության մակարդակը կտրուկ ընկել է: Թեստերի բովանդակությունն այս տարի քննարկման առարկա չի դարձել»,- ասաց Արմեն Աշոտյանը` շարունակելով, որ այսօր «Մաթեմատիկա» առարկայի քննությունն է՝ հաջորդ պիլոտային առարկան, որը նույնպես ունի շտեմարան: Նա հույս հայտնեց, որ հետքննական քննարկումներ և դժգոհություններ չեն լինի: Նրա համոզմամբ` մաթեմատիկայի քննությունը նույնպես կապացուցի, որ նախարարության բռնած ճամնապարհը լավ ճանապարհ է, և վստահորեն կարելի է ասել, որ բոլոր քննական առարկաները հետայսու կկազմակերպվեն շտեմարանային եղանակներով, և հնարավոր կլինի աժիոտաժ չստեղծել:
Անդրադառնալով քննությունների միջին բալերին` նախարարն ասաց, որ միջին բալը բարձր է, որը բերում է ավելի բարձր կոնկուրսի: Նրա խոսքով` կարող էր լինել ավելի բարձր միավոր, որն անցյալ տարի կլիներ 100%-անոց անցողիկ, իսկ այս տարի քանի որ միջինն է բարձրացել 2,4 բալով, ապա բնական է, որ մրցութային անցողիկ միավորները կարող են ավելի բարձր լինել: «Միևնույն ժամանակ, ուզում եմ նորից հիշեցնել, որ կառավարության բանաձևը բուհական կրթության հետևյալն է՝ «հնարավորինս հեշտ ընդունելություն, հնարավորինս դժվար պետական ավարտական քննություն», որովհետև զանգվածային ընդունելությունը մեզ թույլ է տալիս ապահովել յուրաքանչյուրի կրթության իրավունքի իրականացումը, իսկ ավելի խիստ ավարտական պրոցեսը թույլ է տալիս վստահ լինել, որ հասարակություն է մտնում նվազագույն որակական շեմին համապատասխան երիտասարդ մասնագետ»,- ասաց ԿԳ նախարար Արմեն Աշոտյանը:
