Mercer Human Resource Consulting միջազգային խորհրդատվական ընկերությունը կազմել է օտարերկրացիների համար ամենաթանկ քաղաքների վարկանիշային աղյուսակը, որը գլխավորում է Ճապոնիայի մայրաքաղաք Տոկիոն,- հաղորդում է Agence France-Presse-ը: Երկրորդ տեղում հայտնվել է Անգոլայի մայրաքաղաք Լուանդան, իսկ երրորդում՝ ևս մեկ ճապոնական քաղաք՝ Օսական: Ռուսաստանի մայրաքաղաք Մոսկվան զբաղեցնում է չորրորդ հորիզոնականը, հնգյակը եզրափակում է շվեյցարական Ժնևը:
Գործակալությունը նշում է, որ տարբեր երկրներում օտարերկրացիների համար ապրելը ավելի էժան է դարձել՝ կապված եվրոգոտու ճգնաժամի հետ: Այսպես՝ Ֆրանսիայի մայրաքաղաք Փարիզի դիրքերն իջել են միանգամից 10 հորիզոնականով, և նա հայտնվել 37-րդ տեղում: Իտալիայի մայրաքաղաք Հռոմը հայտնվել է 42-րդ հորիզոնականում՝ իջնելով 8 տողով: Հունաստանի մայրաքաղաք Աթենքը կորցրել է 24 միավոր և հայտնվել 77-րդ հորիզոնականում:
Լոնդոնը, որն անցյալ տարի զբաղեցնում էր 18-րդ հորիզոնականը, այս տարի հայտնվել է 25-րդում: Մյուս կողմից, օրինակ, Ավստրալիայի Ադելաիդե քաղաքում օտարերկրացիների համար կյանքը թանկացել է. այն բարձրացել է 19 միավորով և զբաղեցրել 27-րդ հորիզոնականը:
Օտարերկրացիների համար ամենաէժան քաղաքը, ըստ Mercer-ի փորձագետների, ինչպես անցյալ տարի, այս տարի ևս Կարաչին է (Պակիստան), որտեղ ծախսը կրկնակի էժան է քան Տոկիոյում:
Mercer ընկերությունն ամեն տարի նման ցուցակ է կազմում՝ օգնելու տրանսազգային ընկերություններին հաշվարկել օտարերկրացիների համար օպտիմալ փոխհատուցումները: Վարկանիշային աղյուսակ կազմողները հաշվի են առնում ավելի քան 200 տարբեր ապրանքների և ծառայությունների (այդ թվում՝ բնակարանի վարձակալության, սննդի, բենզինի) գները աշխարհի 214 քաղաքներում:
