Հայաստանն այն երկրներից է, որտեղ քաղաքական հետապնդումները բացառել չի կարելի: «Առաջին լրատվական»-ի հետ զրույցում նման տեսակետ հայտնեց «Ժառանգություն» կուսակցության նախկին պատգամավոր, փորձագետ Ստեփան Սաֆարյանը՝ անդրադառնալով ՀՀ նախկին ԱԳ նախարար Վարդան Օսկանյանին ԱԱԾ հարցաքննության հրավիրելու փաստին:
Նա միաժամանակ զերծ մնաց կոնկրետ գնահատկաններ տալ այսօր տարածված հայտարարությանը: «Մենք տակավին վերջերս ենք ազատվել քաղբանտարկյալների բեռից: Բայց, թե ինչի հետ գործ ունենք այս դեպքում, դժվարանում եմ ասել: Մի բան միայն պարզ է. եթե Օսկանյանի ղեկավարած «Սիվիլիթաս» հիմնադրամում խախտումներ եղել են, և իշխանությունները դրանց մասին միայն այժմ են բարձրաձայնում, ապա պահի ընտրության առումով, այո, հնարավոր է՝ քաղաքական շարժառիթներ լինեն»,- ասաց Ստեփան Սաֆարյանը:
Նախկին պատգամավորի խոսքերով՝ եթե ոչինչ չկա, և իշխանություններն ուզում են ընդամենը «գործ սարքել», ապա խոսքը լրիվ այլ բանի մասին է:
Նշենք, որ Հայաստանի ԱԳ նախկին նախարար, ԲՀԿ խմբակցության պատգամավոր Վարդան Օսկանյանին կանչել են Ազգային անվտանգության ծառայություն` հարցաքննության:
Նա հարցաքննության կանչվել է Քրեական օրենսգրքի 190-րդ հոդվածի 3-րդ կետի («Հանցավոր ճանապարհով ստացված եկամուտներն օրինականացնելը (փողերի լվացումը)») հատկանիշներով հարուցված քրեական գործի շրջանակում, որն առնչվում է իրեն և իր հիմնադրած «Սիվիլիթաս» հիմնադրամի գործունեությանը: «Ակնհայտ է, որ հարուցված քրեական գործի հետեւում քաղաքական պատվեր կա», նշել է Վ. Օսկանյանը:
