Իսրայելը Հայոց ցեղասպանության հարցը չի օգտագործում որպես թուրքական սանձարձակություններին հակադարձելու միջոց: Այսօր «Առաջին լրատվական»-ի հետ զրույցում այս մասին ասաց թուրքագետ Հակոբ Չաքրյանն` անդրադառնալով Իսրայելի Կնեսեթում վաղը քննարկվելիք Հայոց ցեղասպանության հարցին:
Անդրադառնալով այն տեսակետներին, թե Իսրայելը Հայոց ցեղասպանության հարցը փորձում է օգտագործել Թուրքիայի դեմ՝ որպես գործիք, նա ասաց, որ Հայաստանի համար կարևորն այն է, որ նախաձեռնությունը հասնի նպատակին: Ըստ նրա` հասկանալի է, որ թուրք-իսրայելական հարաբերությունների լարվածությունը սրված է արդեն մի քանի տարի, սակայն Իսրայելը, եթե Թուրքիային հակադարձեր, այլ միջոց կգտներ, քանի որ վերջինիս հնարավորությունները շատ մեծ են, և պարտադիր չէ, որ Իսրայելը վերցներ հենց Հայոց ցեղասպանության հարցն օգտագործեր որպես թուրքական սանձարձակությունները հակադարձելու միջոց:
«Կնեսեթում կան մի շարք գիտնականներ, նույնիսկ՝ քաղաքական գործիչներ, ովքեր անկեղծորեն միշտ պայքարել են, որ Իսրայելը ճանաչի Հայոց ցեղասպանությունը: Հավանաբար Իսրայելում հասունացել է Հայոց ցեղասպանության բանաձևն ընդունելու հարցը, այդ պատճառով այս հարցը պետք չէ պայմանավորել զուտ թուրք-իսրայելական տարաձայնություններով»,- նման կարծիք հայտնեց Հակոբ Չաքրյանը:
