Ինչպես հաղորդում է ամերիկյան Fox News-ը, հղում կատարելով ամերիկյան վարչակազմում իր աղբյուրներին, Եգիպտոսի փոխնախագահ Օմար Սուլեյմանի դեմ իրականացվել է մահափորձ:
Ըստ Fox News-ի` Սուլեյմանի դեմ մահափորձը կատարվել է հունվարի 29-ին` փոխնախագահ նշանակվելուց մեկ օր անց: Հարձակումն իրականացվել է այն ժամանակ, երբ ինքը իր ավտոշարասյան մեքենաներից մեկում է եղել: Արդյունքում զոհվել են նրա երկու թիկնապահները: Այլ մանրամասներ հայտնի չեն: Եգիպտոսի իշխանություններն այս հարցի շուրջ մեկնաբանություններ դեռ չեն տվել:
Հիշեցնենք, որ Եգիպտոսում մի քանի օր տևած բախումներից հետո Օմար Սուլեյմանը, որը նախկինում գլխավորել էր հետախուզությունը, և համարվում է տարածաշրջանի իր ոլորտի ամենահայտնի դեմքերից մեկը, հունվարի 28-ին նախագահ Հոսնի Մուբարաքի կողմից նշանակվեց Եգիպտոսի փոխնախագահ: Այս քայլը հետևեց նույն օրը` հունվարի 28-ին տեղի ունեցած բախումներին, որի հետևանքով զոհվեց մոտ 300 մարդ, ավելի քան 4,000 վիրավորվեցին:
