Թուրքական Hürriyet թերթի փոխանցմամբ՝ Թուրքիայի ցամաքային զորքերի հրամանատար, բանակի գեներալ Հայրի Քըվրըքօղլուն եռօրյա ադրբեջանական այցից հետո նախորդ ուրբաթ վերադարձավ հայրենիք: Սակայն կիրակի էլ Ադրբեջան ժամանեց Ժանդարմերիայի հրամանատար, բանակի գեներալ Բեքիր Քալյոնջուն:
Թուրքիայի զինված ուժերի այս երկու բարձրաստիճան ներկայացուցիչների իրար հետևից այցերը հանդիսանում են Երևանին Անկարայի հասցեագրած ռազմական ուղերձ՝ կապված վերջին շրջանում հայ-ադրբեջանական շփման գծում գրանցված վերջին բախումների հետ, որոնց հետևանքով երկու կողմից զոհվել է 8 մարդ:
Այս բախումների կապակցությամբ ադրբեջանական ազդեցիկ «Ենի Մուսավաթ» թերթը քննադատել է երկրի ղեկավարությանը՝ ընդգծելով, որ սահմանային բախումներում զոհված ադրբեջանցի 5 զինծառայողները 18-19 տարեկան են, անփորձ են և չունեն կրթություն: Թերթն ուշադրություն էր հրավիրել դրա վրա, որ երկրի ղեկավարությունը սահման է գործուղում այդպիսի զինվորների:
Հիշեցնենք, որ ոչ վաղ անցյալում EurasiaNet-ը, մեկնաբանելով թուրք զորահրամանատարների առաջիկա ադրբեջանական այցերը, դրանք որակել էր որպես Իրանին Թուրքիայի հասցեագրած հաղորդագրություն՝ նկատի ունենալով վերջին շրջանում իրանա-ադրբեջանական լարված հարաբերությունները: