ՀՀ գյուղնախարարության սննդամթերքի ավտանգության եւ անասնաբուժական պետական տեսչության Սյունիքի մարզային կենտրոնի պետ Էդգար Թոխսանցը ուրբաթ մարզի անասնաբույժների հետ Սիսիանի Մուցք գյուղում էր:
Երեկ հաստատվեց, որ գյուղի խոզերի մեջ տարածված հիվանդությունն աֆրիկյան ժանտախտ է:
Ինչպես «Առաջին լրատվականին» տեղեկացրեց մարզի գլխավոր անասնաբույժը, բոլոր գյուղացիները ապահովվել են ախտահանիչներով։ Գյուղում իրականացվում են վարակազերծման համապատասխան միջոցառումներ։
Հետաքրքիր է, որ չնայած աֆրիկյան ժանտախտը հաստատվել է լաբորատոր փորձաքննությամբ, սակայն հիվանդ կենդանիների ախտանիշները չեն համապատասխանում այդ հիվանդությանը:
«Աֆրիկյան ժանտախտի դեպքում կենդանու բերանից ու քթածակերից լորձ ու արյուն է հոսում, մի քանի անգամ մեծանում են լյարդն ու երիկամները, սակայն նման նշաններ հիվանդ խոզերի մոտ չեն եղել»,-ասում է գյուղապետ Դրաստամատ Նավասարդյանը։
Մուցքեցիների խոսքով, հարկադիր մորթի ենթարկված կենդանիների ներքին օրգանները ձևափոխված չէին։ Գյուղացիները ճաշակել են հիվանդ խոզերի միսը և հետևանքներ չեն եղել։
Գյուղապետը նույնպես կերել է, ու ասում է՝ լավ մշակելու դեպքում միսը անվնաս է մարդու համար։
Նշենք, որ նախկինում գյուղում աֆրիկյան ժանտախտ չի եղել։ Գյուղի 170 խոզերից 22-ը արդեն մորթվել է։