Հունիսի 12-ին տեղի կունենա «Հացը լեռներում» տոնածիսական կերակրատեսակների փառատոնը:
«Այս տոնը արդեն 4 տարի է կազմակերպվում է: Միջոցառման նպատակն է մեր ազգային խոհանոցի ցուցադրումը և ներկայացումը հանրության լայն շերտերին: Ներկայացվելու է 13 տոն՝ ժողովրդական և եկեղեցական: Ներկայացվելու են նաև, թե այդ տոների ժամանակ ինչպես են զարդարվել սեղանները, և որն է եղել այդ կերակրատեսակների իմաստը, քանի որ ծիսական տոներին բոլոր ուտեստները իմաստ են ունեցել»,- լրագրողների հետ հանդիպմանը ասաց «Հայ խոհարարական ավանդույթների պահպանման և զարգացման» ՀԿ նախագահ Սեդրակ Մամուլյանը:
Նա նշեց, որ բացի կերակրատեսակների ցուցադրումից, կլինի նաև ազգային երգ և պար. «Այս փառատոնը միշտ փակվում է ավանդական քոչարիով»:
Համատեղ ասուլիսի ժամանակ Վահե Անթանեսյանը տեղեկացրեց, որ փառատոնին հրավիրված կլինեն նաև Հայաստանում բնակվող ազգային փոքրամասնությունները, որոնք ևս կներկայացնեն իրենց ազգային ուտեստները, երգն ու պարը. «Մենք դիմել ենք բոլոր ազգային փոքրամասնություններին, բայց, ցավոք, պատասխան ստացել ենք միայն հունական և ուկրաինական համայնքներից»:
Նա նշեց, որ խոհարարական բոլոր միջոցառումները, որոնք իրենք կազմակերպել են, ունեցել են հետևյալ խորագիրը. «Ճանաչիր ինքնությունդ խոհանոցի միջոցով, քանի որ խոհանոցը ինքնությունը արտահայտող վառ ձևերից մեկն է: Լինելով ոչ նյութական արժեք՝ շատ ավելի արդիական է և շոշափելի: Բոլորը օգտվում են հայկական խոհանոցից»:
Վերջում Սեդրակ Մամուլյանը նշեց, որ իրենք դիմել են նախորդ ԱԺ-ին, պատրաստվում են նաև այս ԱԺ-ին դիմել, որ հունիսի 12-ը Հայաստանում նշվի որպես խոհարարների օր: