ՀՀ նախկին արտգործնախարար Ալեքսանդր Արզումանյանը մամուլի ասուլիսի ժամանակ կարծիք հայտնեց, որ ցանկացած ժողովրդավարական շարժում պետք է միայն ողջունել: Նա հիշեցրեց, թե ինչպես էր 2008 թ. փետրվարյան օրերին Ազատության հրապարակում հավաքված ժողովուրդը ցնծությամբ և հրճվանքով ընդունում տարբեր երկրներից և հայկական համայնքներից եկած հեռագրերն ու ողջույնները:
Նա անընդունելի է համարում այն մոտեցումը, երբ Հայաստանում բռնապետության դեմ պայքարող մարդիկ խուսափում են գնահատականներ տալ Եգիպտոսում տեղի ունեցող իրադարձություններին և միայն սսկված հետևում են դրանց:
«Դա զրկում է այդ մարդկանց այլ շարժումների գոնե բարոյական աջակցությունն ակնկալելու իրավունքից»,- ասաց նա:
Ալեքսանդր Արզումանյանին դուր են եկել Եգիպտոսի ժողովրդի կարգախոսները` հաց, արժանապատվություն, ազատություն: Հետևելով Եգիպտոսի իրադարձություններին` Ալեքսանդր Արզումանյանը եզրակացրել է, որ, եթե այդպիսի բռնապետներ են վռնդվում, ապա բռնապետիկներին վռնդելն անհամեմատ հեշտ է:
Պատասխանելով այն հարցին, թե Հայաստանում կա՞ ժողովրդին առաջնորդող ուժ, Ալեքսանդր Արզումանյանը նշեց, որ կա Հայ ազգային կոնգրեսը, և որևէ մեկը նրա լիդերի հեղինակությունը կասկածի չի ենթարկել: Եվ, ըստ ՀՀ նախկին արտգործնախարարի, եթե գտնվեն այլ ընդդիմադիր ուժեր, որոնք կառաջնորդեն ժողովրդին, կարող են դա անել: Ինչ վերաբերում է համաժողովրդական շարժումները դրսից ուղղորդելուն, ապա ընդդիմադիր գործիչը նշեց, որ ինքը չի ընդունում «դավադրությունների տեսությունը», և պետք չէ հրապարակ դուրս եկած ժողովրդին վիրավորել` նրան համարելով ուղղորդված: