ՀՀ նախկին արտգործնախարար, Հայ ազգային կոնգրեսի անդամ Ալեքսանդր Արզումանյանը, մամուլի ասուլիսի ժամանակ անդրադառնալով Եգիպտոսում տեղի ունեցող իրադարձություններին, նշեց, որ չնայած իշխանությունների ուղարկած սադրիչներին` ցուցարարները կարողացան կազմակերպել իրենց ինքնապաշտպանությունը:
Նա կարծիք հայտնեց, որ Թունիսի իրադարձությունները չեն կարող ունենալ այն ազդեցությունը արաբական աշխարհում, ինչ ունի Եգիպտոսը: Համեմատելով Հայաստանում 2008 թ. տեղի ունեցած իրադարձությունների հետ` Ալեքսանդր Արզումանյանը նշեց, որ, եթե Հայաստանում իշխանություններն ուղարկել են սափրագլուխներին կամ այս կամ այն օլիգարխի թիկնապահներին, իսկ Մարտի 1-ին ուղարկել են սադրիչների, ապա Եգիպտոսում վերջին օրերին բանտերից ազատել են մոտ 16 հազարի չափ քրեական տարրերի:
Հիշելով Մարտի 1-ին Երևանում տեղի ունեցածը` Ալեքսանդր Արզումանյանը հայտարարեց, որ իշխանությունների գործողությունները խաղաղ ցուցարարների նկատմամբ մեծ վրդովմունք առաջացրին, և անգամ նրանք, ովքեր մինչ այդ չէին մասնակցել ընդդիմության հանրահավաքներին, այդ օրն իրենց բողոքն արտահայտեցին` Մյասնիկյանի արձանի մոտ հավաքվելով: Ինչ վերաբերում է Եգիպտոսի իրադարձություններին, ապա Ալեքսանդր Արզումանյանի կարծիքով` «հենց Մուբարաքի մնալն է երկիրը տանում դեպի քաոս և ոչ թե ցուցարարների գործողությունները»: Ալեքսանդր Արզումանյանը հիշեցրեց, որ Եգիպտոսի բանակը ապրում է ԱՄՆ տրամադրած տարեկան 1-2 մլրդ դոլարի հաշվին:
«Հայտարարությունները, որ բանակի ոչ խոհեմ գործողությունները կարող են հանգեցնել այդ օգնության նվազման, սաստող հանգամանք էր և բանակը Եգիպտոսը դեպի կոլապս տանելուց զերծ պահեց»,- ասաց Ալեքսանդր Արզումանյանը: Նա հավելեց, որ ոչ ոք չի կարող ասել, թե ինչ զարգացումներ կլինեն, եթե Եգիպտոսում անցկացվեն ազատ, արդար ընտրություններ: Ընդդիմադիր գործիչը կարծում է, որ «Մուսուլման եղբայրները» Եգիպտոսում որևէ ազդեցություն չեն ունեցել: Ալեքսանդր Արզումանյանը կարծում է, որ, եթե Եգիպտոսում հաղթի ժողովրդավարությունը, ապա այն կարող է չափանիշ դառնալ Միջին Արևելքի երկրների համար: Նա չբացառեց, որ Եգիպտոսում ռեժիմը տապալվելուց հետո վերանայվեն սահմանները և Միջին Արևելքում ի հայտ գան նոր երկրներ:
