Ռուսական Независимая газета թերթում հրապարակվել է հայ-ադրբեջանական շփման գծում գրանցված վերջին բախումներին նվիրված Յուրի Ռոքսի հոդվածը, որում ասվում է.
«Երևանի ու Բաքվի միջև լարվածությունը հասել է վերջին տարիների համար աննախադեպ մակարդակի: Միայն այս շաբաթ հայ-ադրբեջանական սահմանին գրանցվեցին մի քանի դիվերսիոն հարձակումներ: Այդ բախումներից հետո միջադեպեր գրանցվեցին նաև ղարաբաղա-ադրբեջանական շփման գծում: Այդ ամենի հետևանքով երկու կողմն էլ ունեցել են զոհեր ու վիրավորներ:
Հայաստանն ու Ադրբեջանը տեղի ունեցածի մեջ սկսեցին մեղադրել միմյանց: ԱՄՆ-ը, Ֆրանսիան, Թուրքիան գրեթե միաժամանակ հանդես եկան լարվածության էսկալացիայի դադարեցման կոչերով: Իսկ ինչ վերաբերում է Հայաստանի ռազմավարական դաշնակից և միաժամանակ Ադրբեջանի գործընկեր Ռուսաստանին, ապա նա արձագանքեց ամենավերջում: Ռուսաստանը նախընտրում է չմիջամտել հայ-ադրբեջանական դիմակայությանը:
ԼՂՀ պաշտպանության նախարարության մամլո քարտուղար Սենոր Հասրաթյանը հայտարարեց, որ այս տարվա հունվար-հունիս ամիսներին ղարաբաղա-ադրբեջանական շփման գծում հակառակ կողմը հրադադարի ռեժիմը խախտել է ավելի քան 5000 անգամ՝ ընդգծելով, որ միայն հունիսին ադրբեջանական կողմն իրականացրել է 6 հետախուզական-դիվերսիոն հարձակում, ինչի հետևանքով զոհվել է ադրբեջանցի 20 զինծառայող:
Այս սարսափելի վիճակագրությունը հաստատում է Ադրբեջանի ռազմական լրագրողների հետազոտական կենտրոնը, որի տվյալներով՝ այս տարվա հունվար-հունիս ամիսներին Ադրբեջանի զինված ուժերը տվել են 52 սպանված: Հայկական կողմն ավելի քիչ կորուստներ է տվել:
Երևանի ու Բաքվի միջև լարվածության մեծացման և ԱՄՆ-ի, Ֆրանսիայի, Թուրքիայի, ԵԱՀԿ-ի խաղաղության կոչերի ֆոնին զարմանալի է մնում հրապարակավ արձագանքի բացակայությունը Մոսկվայի, որը Հարավային Կովկասը հռչակել է իր աշխարհաքաղաքական շահերի ավանդական գոտի:
Միայն հինգշաբթի՝ օրվա երկրորդ կեսին, Ռուսաստանի ԱԳՆ-ի պաշտոնական ներկայացուցիչ Ալեքսանդր Լուկաշևիչը հույս հայտնեց, որ Փարիզում Հայաստանի ու Ադրբեջանի արտգործնախարարների հանդիպման ժամանակ նրանց կհաջողվի մեղմել իրավիճակը, իսկ մինչ այդ կողմերը զսպվածություն կցուցաբերեն»: