ԿԲ-ն հրապարակել է 2011 թ. առաջին եռամսյակի դրամավարկային քաղաքականության ծրագիրը, որտեղ կանխատեսումներ են արված առաջիկա 12 ամիսների գնաճի վերաբերյալ: Ըստ այդմ, եթե կանխատեսումների հիմքում դրվել է շուկայական տոկոսադրույքների՝ ներկայումս ձևավորված մակարդակի պահպանման վարկածը, նշանակում է՝ գնահատվել են գնաճի հնարավոր զարգացումները ներկայիս պահպանողական դրամավարկային քաղաքականության շարունակման պայմաններում:
«Այս վարկածի հիման վրա ստացված կանխատեսումների համաձայն՝ դեռևս տարեվերջից փոխանցվող առաջարկի շոկերով, այդ թվում՝ գյուղատնտեսական ապրանքների գների աննախադեպ բարձր աճով և հիմնական պարենային և հումքային ապրանքների միջազգային գների բարձրացմամբ պայմանավորված՝ 2011 թվականի առաջին կիսամյակում 12-ամսյա գնաճը կպահպանվի բարձր մակարդակում. 12-ամսյա գնաճի կենտրոնական արժեքը առաջին կիսամյակի ավարտին կանխատեսվում է 9.5%:
Երրորդ եռամսյակից սկսած՝ նշված ցնցումների մարման պայմաններում,գնաճի տեմպերը կնվազեն և տարեվերջին կանխատեսվող գնաճի կենտրոնական արժեքը կկազմի 5.3%, ինչը, սակայն, դեռևս բարձր կլինի 12-ամսյա գնաճի 4±1.5% նպատակային թիրախի կենտրոնական արժեքից:
Բացի այդ, առկա անորոշությունների պայմաններում բարձր է նաև կանխատեսվող կենտրոնական արժեքից գնաճի շեղման հավանականությունը: Շուրջ 41% հավանականությամբ՝ 12-ամսյա գնաճը տարեվերջին կարող է լինել 5.5 – 7.5%-ի շրջանակներում»,- նշված է այդ ծրագրում:
Լուսանկարը՝ PanArmenianPhoto-ի