2010 թ. հուլիսի վերջին Տավուշի մարզի մարտական դիրքերում սպանված լեյտենանտ Արտակ Նազարյանի գործով Տավուշի մարզի ընդհանուր իրավասության դատարանում երեկ շարունակված նիստում դատարանը վերջապես հետազոտել է գործով առանցքային վկա Արթուր Մկրտչյանի կողմից «Ազատություն» ռադիոկայանին տված հարցազրույցի տեսագրությունը: Դրանում վկան հայտնում է, որ Ռազմական ոստիկանության աշխատակից, կապիտան Բադալյանն ու գործով քննիչ Սարգիս Մադաթյանն են ծեծելով իրեն ստիպել ծառայակից 3 զինվորների դեմ ցուցմունքներ տալ, իսկ ներկայումս դատարանում ամբաստանյալի աթոռին գտնվող 3 զինվորները` Ադիբեկ Հովհաննիսյանը, Մխիթար Մխիթարյանը, Հարութիկ Կիրակոսյանը, անմեղ են: Սակայն, ինչպես հայտնի է, դատարանում հարցաքննվելիս տղան պնդել է, թե նույն հարցազրույցը տվել է՝ վախենալով ամբաստանյալների ծնողներից:
Դատարանը, չնայած ամբաստանյալների պաշտպանների միջնորդությանը, հրաժարվել է տեսաերիզը ճանաչել որպես ապացույց և կցել գործին:
Ինչպես «Առաջին լրատվական»-ին հայտնեց տուժողի իրավահաջորդի ներկայացուցիչ Ռուբեն Մարտիրոսյանը, դատարանում մեղադրող դատախազներ Հայկ Հարոյանը և Հարություն Հարությունյանը հայտարարել են, թե վկան հարցազրույցը տվել է ամբաստանյալների ծնողների ճնշման ներքո, իսկ Մկրտչյանի ճշմարիտ ցուցմունքը տրվել է դատարանում:
«Հարցազրույցի տեսագրությունից պարզ է, որ տղան անկաշկանդ ցուցմունք է տալիս»,- ասում է Ռուբեն Մարտիրոսյանը և հավաստիացնում, որ հարցաքննվող վկան եղբոր մասին անհանգստանալով է դատարանում կեղծ ցուցմունքներ տալիս: Ռուբեն Մարտիրոսյանի համոզմամբ` Արթուր Մկրտչյանի կրտսեր եղբայրը զորամասում է ծառայում, և երբ Արտակ Նազարյանի սպանությունից հետո Արթուր Մկրտչյանին կալանավորել են, Ռազմական ոստիկանություն է բերվել նաև Արթուրի եղբայրը՝ չնայած նա ոչ մի կապ չի ունեցել այդ սպանության հետ։
«Ես հայտարարեցի՝ դա ապացուցում է, որ Արթուր Մկրտչյանի կրստեր եղբորը վերցրել են որպես պատանդ, և վկայի եղբայրը այս պահին դեռ ծառայում է, ինչի հետևանքով էլ վկան ճշմարտությունն ասելու հնարավորություն չունի»,- ավել վաղ «Առաջին լրատվական»-ի հետ զրույցում նշել էր Մարտիրոսյանը:
Երեկվա նիստում դատարանում ընթերցվել է նաև ոստիկանության Վաղարշապատի բաժնի պետի գրությունը, ըստ որի` գործով մյուս առանցքային վկա Արման Մնացականյանը ամբուլատոր բուժման մեջ է՝ սրտի ռիթմի խանգարման պատճառով: Գրության իսկությանը ինչպես պաշտպանը, այնպես էլ տուժող կողմը չի հավատում, և երեկվա նիստում նրանք դատարանից պահանջել են բժշկական հանձնաժողովի փորձաքննության միջոցով ստուգել Մնացականյանի առողջական իրական վիճակը:
Հունիսի 12-ին նշանակված հաջորդ նիստում դատարանը, հավանաբար, կանդրադառնա այս միջնորդությանը: