Ինչպիսի՞ն կլինի ՀՀ Մարդու իրավունքների երրորդ պաշտպանը: Արդյո՞ք նրան կհաջողվի պաշտպանել մարդու իրավունքները: «Առաջին լրատվական»-ի հարցին «Հայաստանի պառլամենտարիզմի կենտրոն» հասարակական կազմակերպության նախագահ Ռուբեն Թորոսյանն արձագանքեց.
«Ո՞նց կարող է Սերժ Սարգսյանը նորմալ մարդու առաջարկել այդ պաշտոնում: Նա ի վիճակի չէ դա անելու»:
Անդրադառնալով Մարդու իրավունքների պաշտպան Արմեն Հարությունյանին` Ռուբեն Թորոսյանը նշեց, որ նրա հարցը, ԱԺ կանոնակարգի համաձայն, դեռ պետք է քննարկվի Ազգային ժողովում: Ռուբեն Թորոսյանը «Առաջին լրատվական»-ի հետ զրույցում կարծիք հայտնեց, որ Արմեն Հարությունյանն այնքան էլ հոժարակամ չի համաձայնել ստանձնելու Կենտրոնական Ասիայում ՄԱԿ-ի Մարդու իրավունքների գլխավոր հանձնակատարի տարածաշրջանային ներկայացուցչի պաշտոնը, չնայած փող շատ է սիրում:
Ռուբեն Թորոսյանը ուշադրություն է հրավիրում այն փաստի վրա, որ ՄԻՊ իրավախորհրդատու Գեորգի Կուտոյանին նշանակել են Սերժ Սարգսյանի օգնական, իսկ նրա աշխատակազմի ղեկավար Վահե Ստեփանյանին` Երևանի քաղաքապետարանում` աշխատակազմի քարտուղար: Եվ այդ նշանակումները նախորդել են Արմեն Հարությունյանի հրաժարականին:
Ռուբեն Թորոսյանը հիշեցնում է, որ Արմեն Հարությունյանը երդում է տվել` կատարելու իր պարտականությունները:
«Բա ու՞մ համար էր այդ երդումը»,- հարցնում է մեր զրուցակիցը:
