Աշխարհում վիդեոխաղերի առաջատար արտադրող Nintendo ընկերությունը Լոս Անջելեսում անցկացվող ինտերակտիվ զվարճանքների արդյունաբերության ցուցահանդեսի՝ Electronic Entertainment Expo-ի ժամանակ ներկայացրել է սեփական Miiverse սոցիալական ցանցը:
Nintendo-ի ղեկավար Սատորու Իվատայի խոսքով՝ նախագծի նպատակը աշխարհում վիդեոխաղերի սիրահարներին միավորելն է: Սոցիալական ցանցը նրանց հնարավորություն կտա շփվել նաև տեսակապով: Ղեկավարի խոսքով՝ սոցիալական ցանց մուտք կարող են ունենալ դեռևս վերջին սերնդի խաղային ապարատների՝ Nintendo Wii U-ի տերերը, սակայն ավելի ուշ պորտալը հասանելի կլինի սմարթֆոնների տերերին:
Լոս Անջելեսում անցկացվող ցուցահանդեսը, որը կշարունակվի մինչև հունիսի 7-ը, կազմակերպվում է 1995 թվականից: Այս տարի ցուցահանդեսին մասնակցում է ավելի քան 200 ընկերություն, ինչպես նաև ոլորտի 46 փորձագետներ և վերլուծաբաններ: