Գործարար Սամվել Ալեքսանյանին պատկանող «Ալեքս Գրիգը» 3.5 անգամ ավելի քիչ սոցիալական ապահովության վճարներ է մուծում, քան Երևանի պետական համալսարանը, 2.6 ամգամ ավելի քիչ, քան Երևանի Մխիթար Հերացու անվան պետական բժշկական համալսարանը, 1.8 անգամ ավելի քիչ, քան Խաչատուր Աբովյանի անվան Հայաստանի պետական մանկավարժական համալսարանը:
Համոզվելու համար բավական է ծանոթանալ նախօրեին ՊԵԿ-ի հրապարակած 2010թ. ընթացքում սոցիալական ապահովագրության վճար վճարած 1000 ամենախոշոր ընկերությունների և նրանց կողմից վճարված պարտադիր սոցիալական ապահովության վճարների ընդհանուր գումարների ցանկին:
ԵՊՀ-ն 2010թ. սոցիալական ապահովության վճարների ծավալով զբաղեցնում է ցուցակի 6-րդ հորիզոնականը (702 մլն դրամ), Բժշկական համալսարանը` 9-րդ հորիզոնականը (մոտ 521.5 մլն դրամ), Մանկավարժական համալսարանը` 15-րդ հորիզոնականը (352.5 մլն դրամ): Իսկ «Ալեքս գրիգը»` 38-րդ հորիզոնականը (199.8 մլն դրամ) է:
Պատգամավոր Ալիկ Պետրոսյանի «ՄԱՊ»-ը, Գուրգեն Արսենյանի (ՄԱԿ կուսակցության ղեկավար) վառելիք ներմուծող«Արսօյլ» ՀՁ-ն ավելի քիչ սոցիալական ապահովության վճարներ են վճարել, քան Երևանում գտնվող բոլոր պետական համալսարանները: Նրանք զբաղեցնում են ցուցակի համապատասխանաբար` 236-րդ և 329-րդ հորիզոնականները:
