Դատահոգեբուժական փորձաքննության արդյունքում մեղսունակ ճանաչված, 2011 թ. հոկտեմբերի 31-ին Իջևանում 69-ամյա Սուսաննա Բեկնազարյանի նկատմամբ բռնաբարության փորձ կատարած 24-ամյա Վազգեն Օհանյանը դատապարտվեց ազատազրկման:
Տավուշի մարզի առաջին ատյանի դատարանի որոշմամբ՝ նա ազատազրկվել է 2 տարի 8 ամիս ժամկետով:
Խոսքը վերաբերում է նույն այն երիտասարդին, որը անցյալ տարվա հոկտեմբերի 30-ին՝ գիշերը ժամը 3-ի սահմաններում, բաց դռնից մուտք էր գործել Իջևան քաղաքի Այգեստան փողոցի տներից մեկը և փորձել բռնաբարել 1942թ. ծնված Սուսաննա Բեկնազարյանին: Կինը սկսել էր բարձր գոռալ, օգնություն կանչել, որից հետո սենյակ էր մտել նրա 19-ամյա թոռը։ Վազգեն Օհանյանը դուրս էր փախել բնակարանից, իսկ կնոջը տրվել է դատաբժշկական փորձաքննության ուղեգիր: Հաջորդ օրը ոստիկանության Իջևանի բաժնի աշխատակիցները բերման էին ենթարկել Վազգեն Օհանյանին: 24-ամյա երիտասարդը մեղադրվում էր ՀՀ քրեական օրենսգրքի 34/138 հոդվածի 1-ին մասով և 147 հոդվածի 1-ին մասով:
Նախկինում դատված Վազգեն Օհանյանը թեև նախաքննական փուլում բռնաբարության փորձ կատարելու մեջ իրեն մեղավոր էր ճանաչել, այնուհետ հրաժարվել դրանից, հետագայում դատարանում իրեն միայն գողության մեջ էր մեղավոր ճանաչել, իսկ բռնաբարության փորձի մեջ` ոչ:
Ինչ վերաբերում է տուժող Սուսաննա Բեկնազարյանին` նրա կողմից դատարանում հնչեցված ցուցմունքներից պարզ էր դարձել, որ կինը հիշողության հետ խնդիրներ ունի, իսկ դատարանում գտնված նրա դուստրը խնդրել էր նախագահող դատավորին հնարավորության դեպքում փակել այս գործը, քանի որ մայրը արտահայտված վատ հիշողություն ունի, իսկ տղան երիտասարդ է: