Հայաստանի և Չեխիայի առևտրաշրջանառության ծավալները, չնայած վերջին տարիներին նկատվել է աճ, դեռևս չափազանց փոքր են: Հայաստանի ընդհանուր առևտրաշրջանառության մեջ Չեխիայի տեսակարար կշիռը կազմում է ընդամենը 1.3 %, որը հիմնականում ներմուծումների հաշվին է:
Մաքսային ծառայության տվյալների համաձայն` 2011 թ. ՀՀ-ՉՀ առևտրաշրջանառությունը կազմել է 26 մլն 15.3 հզ. դոլար` նախորդ տարվա 19 մլն 712.4 հզ. դոլարի փոխարեն (աճը` 32.7 %), այդ թվում՝ 2011-ին արտահանումը կազմել է 1.9 մլն դոլար (աճը՝ 61 %), ներմուծումը՝ 24.1 մլն դոլար (30 %):
Հայաստանից Չեխիա արտահանվում են մոլիբդենի խտանյութ, ֆերոմոլիբդեն, խեցգետնակերպեր, փայտյա իրեր, ձեռագործ գորգեր, խեցեգործական իրեր, ադամանդ, կիսաթանկարժեք քարեր, կահույքի մասեր և այլն, իսկ ներմուծվում են հրուշակեղեն, գարեջուր, սննդամթերք, դեղամիջոցներ, պլաստմասե իրեր, թուղթ, տրիկոտաժեղեն, հագուստ, հատակի և պատի երեսապատման սալիկներ, սպասք, գազի վառարաններ, հեղուկի և գազի պոմպեր, տպագրական սարքավորումներ, էլեկտրալամպեր, բժշկական սարքավորումներ, քանդակների և արձանիկների բնօրինակներ և այլն:
