Նորաստեղծ «Շրջադարձ» կուսակցության նախագահ, նախկինում երկու անգամ ՀՀԿ-ական Սիմոն Ղոնաղչյանը նշեց, որ դժգոհ է իշխանությունների վարած սոցիալ-տնտեսական քաղաքականությունից: Նրա գնահատմամբ, իշխանություններն այլևս ի վիճակի չեն շտկելու ներկա իրավիճակը.
«ՀՀԿ-ն բավական ջանք չի կիրառում իր վրա վերցրած պատասխանատվության շրջանակներում բարեփոխումներ իրականացնելու համար: ՀՀԿ-ն ինքնամաքրման մեծ ճանապարհ ունի անցնելու»:
Ղոնաղչյանը նաև նկատեց, որ իր կուսակցության խորհուրդը մտահոգված է 2008թ. Մարտի 1-ի դեպքերից հետո բանտերում հայտնված քաղաքացիների համար, ովքեր ներկայացնում են քաղաքական ուժ, որն առաջիկայում պատրաստվում է մասնակցել ընտրությունների:
«Շրջադարձը» դատապարտում է Ա1+, «Գալա», ԱԼՄ հեռուստաընկերությունների եթերազրկումը:
Այդուամենայնիվ, Ղոնաղչյանը նշեց, որ կուսակցությունն այսօր իր առջև Սերժ Սարգսյանի հրաժարականի հարցը չի դնում:
Ավելին, Ղոնաղչյանը գոհ է Սերժ Սարգսյանի իրականացրած արտաքին քաղաքականությամբ, մասնավորապես հայ-թուրքական հարաբերությունների կարգավորման բնագավառում. «Կարծում եմ, որ Սերժ Սարգսյանը փորձեց առաջանցիկ քայլ կատարել, ինչը մենք պետք է անեինք, մենք պիտի տեսնեինք, թե մեր հարևանը ինչպիսի վարքագիծ կդրսևորի այդ հարցում»:
Ղարաբաղյան հարցի կարգավորման գործընթացին անդրադառնալով` Ղոնաղչյանն ասաց, որ ինքը տեղյակ է այնքան, ինչքան Հայաստանի մյուս քաղաքացիները, և իր դիրքորոշումն այն է, որ պետք է կարգավորումը հիմնված լինի փոխադարձ համաձայնության և փոխադարձ զիջումների վրա, որոնք էլ պետք է կշռվեն:
