Պետական դավաճանություն գործելու մեջ մեղավոր ճանաչվածների գործով ՀՀ վերաքննիչ քրեական դատարան ներկայացված բողոքի քննությունն այսօր հետաձգվել է մինչև հունիսի 20-ը: Այս մասին «Առաջին լրատվական»–ին հայտնեց պետական դավաճանություն գործելու մեջ մեղավոր ճանաչված և 10 տարվա ազատազրկման դատապարտված Աշոտ Չտրկյանի պաշտպան Հարություն Բաղդասարյանը: Այսօրվա դատական նիստը, նրա խոսքով, հետաձգվել է, քանի որ մեղադրյալներից Արթուր և Դավիթ Ավետիքյանները, ինչպես նաև Կարեն Պետրոսյանն ու Կարեն Մեհրաբյանը ցանկություն են հայտնել նոր պաշտպաններ ներգրավել:
Եղբայրներ Ավետիքյանների պաշտպանությունն այսուհետ կիրականացնի փաստաբան Կարեն Թումանյանը, քանի որ երիտասարդների նախկին պաշտպան Էդմոն Մարուքյանն ընտրվել է ԱԺ պատգամավոր:
Մյուս երկու մեղադրյալները` Կարեն Մեհրաբյանն ու Կարեն Պետրոսյանը խնդրել են իրենց հանրային պաշտպաններ տրամադրել:
Հիշեցնենք, որ դավաճանության մեջ մեղադրվածները Վերաքննիչ դատարան բողոք էին ներկայացրել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի կայացրած վճռի դեմ: Մասնավորապես, Աշոտ Չտրկյանի պաշտպանը վերաքննիչ բողոքով պահանջել է ՀՀ Քր. օր-ի 38-299 հոդվածի 1-ին մասով` ազատազրկում 10 տարի ժամկետով` առանց գույքի բռնագրավման վերաբերյալ 06.04.2012 թ. դատավճիռը բեկանելու, և կարճել գործի վարույթը կամ ամբողջությամբ բեկանել դատական ակտը, գործն ուղարկել համապատասխան ստորադաս դատարան` նոր քննության` սահմանելով նոր քննության ծավալը: