Հայաստանում ոսկու ևս մեկ հանքավայր` Ամուլսարի հանքավայրը, կշահագործվի բաց եղանակով: Այս մասին ասվում է «Էկոլուր» հասարակական կազմակերպության տարածած հաղորդագրությունում: Հետախուզման արտոնագիրը ստացել է «Գեոթիմ» ընկերությունը, որը Հայաստանում ներկայացնում է կանադական Lidian International ընկերության շահերը: Ենթադրվում է, որ հանքավայրի շահագործումը կսկսվի 2011 թ.-ին: Մինչ այժմ ընկերությունն անցկացրել է երկրաբանահետախուզական աշխատանքներ և հայտարարել, որ Հայաստանում Ամուլսարը ոսկու պաշարների նոր հայտնություն է:
Ընկերության տվյալներով հանքավայրը պարունակում է 1.4 միլիոն ունցիա ոսկի` մոտ 40 տոննա: Ոսկու կորզման համար ընկերությունը ենթադրում է կիրառել կույտային տարալվացման (метод кучного выщелачивания) մեթոդ, ինչի դեպքում կարելի է 95-97% ոսկի կորզել: Այդ մասին ասված է Highlights բաժնում («Ամենագլխավորը»), որով բացվում է ընկերության կայքը:
Lidian International-ի բաժնետոմսերը արժեքորոշվում են Տորոնտոյի ֆոնդային բորսայում (Կանադա): Ընկերության գլխավոր բաժնետերը IFC միջազգային ֆինանսական կորպորացիան է, որը Համաշխարհային բանկի, Newmont Mining Corporation-ի և Վերակառուցման և զարգացման եվրոպական բանկի խմբի մի մասն է: