BBC-ի կայքը Սիրիայի Հուլա բնակավայրում ավելի քան 100 խաղաղ բանկիչների մահվան դեպքերը լուսաբանելիս ներկայացրել է 2003 թ. Իրաքում արված լուսանկարները: Այս մասին հաղորդում է բրիտանական The Daily Telegraph կայքը:
«Հուլայի ջարդը դատապարտել են. ժողովրդի շրջանում դժգոհությունն աճում է» վերտառությամբ լուրը BBC News-ը հրապարակել է մայիսի 27-ին: Լուրի լուսանկարում պատկերված է, թե ինչպես է փոքրիկ երեխան թռչկոտում սպիտակ սավաններով ծածկված տասնյակ դիակների մեջ: Կայքի խմբագրությունը նշել է, որ նկարն արվել է Հուլայում՝ անհայտ մի ակտիվիստի կողմից, և որ դրա հավաստիությունն առայժմ դժվար է պարզել:
Թերթը պարզել է, որ լուսանկարը պատկանում է Մարկո դի Լաուրոյին, ով աշխարտում է Getty Image ֆոտոգործակալությունում: 2003 թ. Լաուրոն լուսանկարել էր Բաղդադից հարավ անապատում հայտնաբերված իրաքցիների դիակները:
Պարբերականին տված հարցազրույցում Լաուրոն հայտարարել է, որ զարմացած է, որ նման խոշոր ընկերություն, ինչպիսին BBC-ն է, չի ճշտում աղբյուրները և պատրաստ է հրապարակել ցանկացած լուսանկար՝ անկախ այն բանից, թե ով է դա արել՝ արհեստավարժ լուսանկարիչ, ակտիվիստ, թե քաղաքացիական լրագրող: Նա նաև հայտարարել է, որ մի դեպքի լուսանկարը ներկայացնել մեկ այլ իրադարձության մասին լուրի տակ, նման է դիտավորյալ քարոզչության:
BBC News-ի խմբագրությունն արդեն հանել է լուսանկարը: BBC-ի ներկայացուցիչը հայտարարել է, որ Հուլայի ռմբակոծության առաջին ժամերին լուսանկարն ակտիվորեն տարածվել է սոցիալական ցանցերով, և որ հենց այդ պատճառով էլ իրենք այն հրապարակել են՝ նշելով, որ դրա հավաստիությունը պարզ չէ:
Հիշեցնենք՝ միջազգային դիտորդների տվյալներով՝ մայիսի 25-ին և 26-ին սիրիական Հուլա բնակավայրի վրա հարձակման հետևանքով զոհվել է 108, վիրավորվել՝ շուրջ 300 մարդ: Սիրիայի կառավարությունը հերքում է իր մասնակցությունը կատարվածին:
