Վրացական «Կվիրիս պալիտրա» թերթի փոխանցմամբ՝ Վրաստանում հետաձգվել է այդ երկրում հավաքված տանկի շնորհանդեսը, որը պետք է տեղի ունենար մայիսի 26-ին Քութայիսում կայացած զորահանդեսի ժամանակ:
Ամենայն հավանականությամբ, Վրաստանում հավաքված տանկի շնորհանդեսը տեղի չի ունեցել դրա տեխնիկական վիճակի պատճառով: Թերթը գրում է, որ տանկի անվանման համար ընտրել են համապատասխան առասպելական հերոսի, և տանկի շնորհանդեսը տեղի կունենա ավելի ուշ:
Միևնույն ժամանակ, Քութայիսի զորահանդեսի ժամանակ առաջին անգամ ցուցադրվել են Իսրայելից գնված «Սփայդեր» զենիթա-հրթիռային համալիրները: Թերթի տվյալներով՝ դրանք արդյունավետորեն գործածվել են 2008 թվականի ռուս-վրացական օգոստոսյան պատերազմի ժամանակ, սակայն ցայժմ Վրաստանի պաշտպանության նախարարությունը չէր հաստատել դրանց գնումը:
Հիշեցնենք, որ մեկ շաբաթ առաջ նույն թերթը հայտնել էր, որ Վրաստանում չեն արտադրվում տանկային շարժիչներ, հրանոթներ, կրակի ղեկավարման համակարգեր, զրահ և այլն, ինչը նշանակում է, որ այդ տանկը պարզապես հավաքվելու և ոչ թե արտադրվելու է Վրաստանում:
Ամենայն հավանականությամբ, դա պետք է լիներ վրացական գործարաններում արդիականացված T-72 տանկը, որի վրա պետք է տեղադրվեր նոր աշտարակ, որով և փոփոխվելու էր տանկի տեսքը:
Ի դեպ, վրացական ԶԼՄ-ները նշում են, որ Թբիլիսիում այլևս երբեք չի անցկացվի Վրաստանում պետական անվտանգության վերականգնմանը (մայիսի 26) նվիրված զորահանդես: Վրաստանի իշխանությունները որոշել են այսուհետ այն անցկացնել Քութայիսում, ուր տեղափոխվում է Վրաստանի խորհրդարանը:
