Հղում անելով իրանական ISNA գործակալությանը` The Tehran Times-ը մեջբերում է Ռեզա Սաջջադի խոսքերը` Ռուսաստանի իշխանությունների հասցեին: Ըստ գործակալության` դեսպանն ասել է, թե «ցավոք, Իրանի միջուկային ծրագրի հետ կապված` Ռուսաստանը սխալ է կատարել` ազդվելով արեւմտյան քարոզչությունից: Ռուսաստանն ու Իրանը շատ ընդհանրություններ ունեն, եւ Իրանից հետ կանգնելը Ռուսաստանի շահերից չի բխում: Իրանի դեսպանն ասել է, որ Ռուսաստանը ձգտում է իր տնտեսական վիճակը բարելավել ԵՄ եւ Ամերիկայի միջոցով, սակայն դա կարող է բերել Ռուսաստանի քայքայմանը եւ բաժանմանը` տարբեր հանրապետությունների: Դեսպանի այն հայտարարությունը, թե «Իրանը խոչընդոտում է Կովկասում թմրանյութերի եւ զենքի տարածմանը»` շատերը մեկնաբանել են որպես սպառնալիք, որի համաձայն` Իրանն այդ հարցում կարող է սկսել վնասել Ռուսաստանին եւ նրա շահերին: