Թուրքական Sabah թերթի փոխանցմամբ՝ Թուրքիայի դատախազությունը պատրաստել է 2010 թվականի մայիսի 31-ին գրանցված «Մավի Մարմարայի» միջադեպի վերաբերյալ մեղադրական եզրակացությունը: Հիշեցնենք, որ այդ միջադեպի ժամանակ զոհվել էր Թուրքիայի 9 քաղաքացի:
Մեղադրական եզրակացությունն իրենում ներառում է 144 էջ: Դրանում առկա են մոտ 600 վկաների տված վկայությունները: Նրանցից 490-ը նավի գրավման ժամանակ գտնվել են այդ նավում: Թուրքական դատախազությունը պահանջում է ցմահ ազատազրկում իսրայելցի 4 բարձրաստիճան զինվորականների համար:
Խոսքը Իսրայելի գլխավոր շտաբի նախկին պետ Գաբի Աշկենազիի, Իսրայելական հետախուզության (ԱՄԱՆ) նախկին ղեկավար Ամոս Յադլինի, Իսրայելի ռազմածովային ուժերի նախկին հրամանատար Էլիեզեր Մերոմի և Իսրայելի հետախուզության նախկին ղեկավար Ավիշայ Լևիի մասին է:
Թուրքական կողմը նրանց մեղադրում է սպանությունների, մարմնական ծանր վնասվածքներ պատճառելու, թալանի, լողացող միջոցների զավթման, կտտանքների ու ապօրինի ձերբակալությունների կատարման մեջ, ինչի համար էլ պահանջում է ցմահ ազատազրկում:
Այդ մեղադրանքը պետք է ստորագրի Ստամբուլի հանրապետական դատախազ Մեհմեթ Աքիֆ Էքինջին: Որոշակի տվյալներով՝ իսրայելցի զինվորականների ձերբակալման հրամաններն արդեն իսկ ստորագրված են: Դա նշանակում է, որ եթե նրանք որոշեն ժամանել Թուրքիա, ապա անմիջապես կձերբակալվեն: