Իրանական լրատվական գործակալությունների հաղորդմամբ, Իրանի նորընտիր ԱԳ նախարար Ալի Աքբար Սալեհիի առաջին պաշտոնական այցը չեղյալ է հայտարարվել: Սալեհին, արդեն որպես ԱԳ նախարար, Աֆրիկյան միության գագաթնաժողովին մասնակցելու նպատակով պետք է մեկներ Եթովպիա:
Նշենք, որ այդ այցի մասին առաջին անգամ գրեց հենց Իրանի նախագահի լրատու կայքը՝ հայտարարելով, որ Սալեհին խորհրդարանի վստահության քվեն ստանալուց հետո մեկնելու է Եթովպիա: Իսկ հետո իրանական Fars և ISNA գործակալությունները հայտարարեցին, որ Սալեհիի այցը չեղյալ է հայտարարվել:
ԱԳՆ խոսնակ Ռամին Մեհմանփարաստը լրագրողներին հայտնել է, որ Սալեհին ԱԳ նախարար ընտրվելու պատճառով, անհետաձգելի բազմաթիվ գործեր է ունեցել, որոնց պատճառով էլ նրա այցը Եթովպիա չեղյալ է հայտարարվել:
Հարկ է նշել, որ Եթովպիայում կայանալու է Աֆրիկյան երկրների ղեկավարների 16-րդ գագաթնաժողովը, որտեղ պետք է քննարկվեն Եգիպտոսի իրադարձությունները, թեև Եգիպտոսը արդեն հրաժարվել է անդամակցել հիշյալ միությանը:
