Թուրքական Dünya Bülteni կայքի փոխանցմամբ՝ Թուրքիայի հիմնական ընդդիմադիր ուժի՝ Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուն այսօր տեղի ունեցած կուսակցական ժողովի ժամանակ Ուլուդերեի միջադեպի կապակցությամբ խիստ քննադատության է ենթարկել վարչապետ Էրդողանին:
Վերջինս հայտարարել է, որ ինքը չի արձակել այդ օպերացիայի սկսման հրամանը, որը հանդիսացել է 34 խաղաղ քուրդ բանկիչների մահվան պատճառ, և այդ օպերացիայի մասին իմացել է միայն դրա ավարտից հետո: Էրդողանը հավելել էր, որ այդ հրամանը ծագել է զինված ուժերից:
Քըլըչդարօղլուն հայտարարել է, որ կառավարությունն ահաբեկչական քաղաքականություն է վարում. «Ամերիկյան Wall Street Journal-ի հրապարակումը վկայեց, որ գլխավոր շտաբն ու վարչապետական ապարատը ստում են Ուլուդերեի միջադեպի կապակցությամբ: Ո՞վ է ձեզ փոխանցել այդ հետախուզական տվյալները:
Ասում են, թե դա եղել է մեր հետախուզական տվյալները և ոչ թե ամերիկյան: Ես 3-5 ամիս այդ մասին հարցնում են հարգարժան վարչապետին: Սակայն իմ հարցադրումից 3 ամիս անց ես պատասխանը ստացա գլխավոր շտաբից: Ի՞նչ է, գլխավոր շտաբն Էրդողանի մամլո գրասենյա՞կն է:
Էրդողանն ասում է, որ Ուլուդերեի միջադեպից հետո է տեղեկացել այդ մասին: Ստացվում է, որ օպերացիան անցկացվել է, մեր 34 հայրենակիցներ զոհվել են, և միայն դրանից հետո է տեղեկանում դրա մասին: Դա ինքնախոստովանություն է, որից հետո նա անգամ 1 ժամ չպետք է մնա իր պաշտոնում:
Դու ինչպե՞ս ես ղեկավարում երկիրը: Սահմանային օպերացիաների անցկացման արտոնությունը կառավարությանը տվել է խորհրդարանը: Վարչապետ Էրդողան, դու «կուկլա՞» ես: Այժմ ցանկանում եմ տալ երկրորդ հարցը. ո՞վ է պատասխանատու օպերացիայի հրամանի արձակման համար»:
Հիշեցնենք, որ Թուրքիայի սահմանադրության 117-րդ հոդվածի համաձայն՝ իր պարտականությունների ու լիազորությունների իրականացման ժամանակ գլխավոր շտաբի պետը պատասխանատու է երկրի վարչապետին:
