Ինչպես փոխանցում է Reuters գործակալությունը, այսօր Ղազախստանի սահմանադրական խորհուրդը որոշում է կայացրել Նուրսութլան նազարբաևի լիազորությունների երկարացման համար երկրում հանրաքվե անցկացնելու հնարավորության վերաբերյալ:
Խորհուրդն անօրինական է համարել այդ հանրաքվեի անցկացումը, որը Նազարբաևին պետք է թույլ տար ևս 10 տարի պաշտոնավարել երկրում` առանց նախագահական ընտրություններ անցկացնելու:
Հիմա Նազարբաևն իրավունք ունի վետո դնել այս որոշման վրա: Սակայն ակնհայտ է, որ մերձավորարևելյան երկրներում տեղի ունեցող հեղափոխական գործընթացների ֆոնի վրա Նուրսուլթան Նազարբաևը դժվարությամբ կգնա այդ քայլին, քանի որ արաբական արևելքում սկիզբ առած շարժումների հիմնական պահանջը իրենց երկրներում օրինական ընտրությունների անցկացումն է և տասնամյակներ շարունակ իրենց աթոռներին կառչած բռնապետերի հեռացումը:
Խորհրդի որոշումից հետո երկրի նախագահի խորհրդական Երմուհամեդ Երթիսբաևը հայտարարել է, որ Սահմանադրական խորհուրդը ոչ թե մերժել է հանրաքվե անցկացնելու գաղափարը, այլ չի ճանաչել խորհրդարանի երկու պալատների կողմից Սահմանադրության մեջ կատարված փոփոխությունները:
«Առաջին լրատվականը» տեղեկացրել էր, որ Ղազախստանի խորհրդարանը ջանք ու եռանդ չէր խնայում այս օրինագիծը կյանքի կոչելու համար:
Սկզբում Նազարբաևն ընդդիմանում էր, հետո հայտարարեց, որ կսպասի սահմանադրական դատարանի որոշմանը` միաժամանակ նշելով, որ տեսել է, թե ինչպես է ժողովուրդն ուզում իր լիազորությունների երկարացումը, քանի որ արդեն հավաքվել է բնակչության ավելի քան 2/3-ի ստորագրությունը: