Այսօր երեկոյան ԱՄՆ պետքարտուղար Հիլարի Քլինթոնը կոչ է արել Եգիպտոսի նախագահ Հոսնի Մուբարաքին` անցկացնելու ազատ և արդար ընտրություններ: Նա ասել է, որ եգիպտական քաղաքներ զորքերի մտցնելու որոշումը խաղաղ բողոքի ակցիաներ անցկացնելու քաղաքացիների իրավունքների խախտում է: Այս մասին հաղորդում է CNN հեռուստաընկերությունը:
Քլինթոնը նաև հայտնել է, որ ԱՄՆ-ն չի պատրաստվում դադարեցնել ֆինանսական օժանդակությունն այդ երկրին, որը կազմում է մոտ 1.5 մլդ դոլար: Քլինթոնը կրկին կոչ է արել Մուբարաքին անցկացնել բարեփոխումներ և նշել, որ «անհրաժեշտ է ծրագրավորված անցում կատարել ժողովրդավարությանը, ինչպես նաև տնտեսական բարեփոխումներին»:
Շատ մեկնաբաններ Քլինթոնի այս հայտարարություններն ուշացած համարեցին: Ուշացած էր նաև Օբամայի ելույթը, որը տեղի ունեցավ այն ժամանակ, երբ Մուբարաքն ուղերձով դիմեց ժողովրդին: Ակնհայտ է, որ ԱՄՆ իշխանությունները դժվարությամբ են պատկերացնում, թե որոնք են լինելու իրենց հետագա գործողությունները, քանի որ այս տարածաշրջանում մեծ շահեր ունեն, և Մուբարաքի հեռացումը, որի հետ ԱՄՆ իշխանությունները սերտ հարաբերություններ ունեն, կարող է լուրջ վնաս հասցնել այդ շահերին: