ԱՄՆ ներկայացուցիչների պալատը խորհուրդ է տվել Կոնգրեսին 2013թ. ֆինանսական տարվա պաշտպանության բյուջեում Իսրայելի համար նախատեսել 849 մլն դոլար: Ինչպես հաղորդում է Defense News-ը, ԱՄՆ Պաշտպանության նախարարության բյուջեի նախագծի բնօրինակում Իսրայելի ֆինանսավորման համար նախատեսվում է 99.8 մլն դոլար: Միջոցները կհատկացվեն, եթե բյուջեի մշակված նախագիծը հավանության արժանանա Կոնգրեսում և ստորագրվի ԱՄՆ նախագահի կողմից:
Բյուջեի նախագծում մտցված փոփոխությունների համաձայն՝ 2013թ. 34 մլն դոլար կհատկացվի Իսրայելի հետ համատեղ «Նետ» հակահրթիռային պաշտպանության համակարգեր ստեղծելու համար: Բացի այդ՝ 111 մլն դոլար Իսրայելը կստանա «Դավթի պարսատիկ» ՀՀՊ համակարգի նախագծի զարգացման համար, ինչպես նաև 680 մլն դոլար «Երկաթե գմբեթ» համակարգի ՀՀՄ համալիրներ գնելու համար:
Այն, որ ԱՄՆ-ը պատրաստվում է ֆինանսավորել Իսրայելի «Երակաթե գմբեթ» ծրագիրը, հայտնի էր դեռ 2012թ. մայիսին: Այդ ժամանակ Ներկայացուցիչների պալատի հատուկ կոմիտեն հայտարարել էր, որ Իսրայելը 29 ամսվա ընթացքում մաս առ մաս կստանա 680 մլն դոլար: Ընդ որում՝ ԱՄՆ ՀՀՊ գործակալությունը պետք է պայմանավորվեր Երուսաղեմի հետ «երկաթե գմբեթի » համատեղ արտադրության շուրջ:
Նախնական գնահատականներով 680 մլն դոլարը Իսրայելին հնարավորություն կտա գնել «Երկաթե գմբեթի» 4 նոր մարտկոց: Ընդհանուր առմամբ երկրի պաշտպանության նախարարությունը պատրաստվում է գնել 10-15 մարտկոց, որոնք առաջին հերթին կտեղակայվեն Լիբանանի և Գազայի սահմանների վրա:
