«Այլընտրանք» քաղաքացիական նախաձեռնության անդամ Վարդգես Գասպարիից «Առաջին լրատվականը» հետաքրքրվեց, թե ինչ ակնկալիքներ ունի փետրվարի 18-ին Հայ ազգային կոնգրեսի հրավիրած հանրահավաքից:
«Փետրվարի 18-ին մենք կունենանք այն, ինչ կանենք մինչև փետրվարի 18-ը: Եթե մենք նստենք ու սպասենք այնպես, ինչպես մինչև հիմա ենք վարվել, ես թերահավատ եմ, որ կարող ենք լավ արդյունքների հասնել: Դրա համար պետք է ակտիվ քարոզչություն իրականացնել` սկսած այսօրվանից:
Շատերը Ազատության հրապարակի «ազատագրումը» պատկերացնում են հետևյալ կերպ. Լևոն Տեր-Պետրոսյանը պետք է բոլորի առջևից քայլելով գա, մտնի Ազատության հրապարակ:
Իսկ ես մտածում եմ, որ դա յուրաքանչյուրի անելիք գործն է, և դա պետք է անել մինչև փետրվարի 18-ը»,- ասաց Վարդգես Գասպարին: Իսկ փետրվարի 18-ին նա ակնկալում է, որ ընդդիմադիր գործիչներն իրենց ելույթներում արծարծեն «Ա1+»-ի հարցը:
«Այդ հարցը մտել է Մարդու իրավունքների եվրոպական դատարան, կա դատարանի վճիռ, ԵԽ Նախարարների կոմիտեի որոշում, որ Հայաստանը չի կատարում այդ վճիռը:
Կցանկանայի, որ հետևողական պայքարի միջոցով պարտադրեինք Հայաստանի կառավարությանը` կատարելու այդ վճիռը»,- նշեց մեր զրուցակիցը:
