Թուրքական Milliyet թերթի փոխանցմամբ՝ Թուրքիայի էկոնոմիկայի նախարար Զաֆեր Չաղլայանը Ստամբուլում կազմակերպված տնտեսական կոնֆերանսի ժամանակ հայտարարել է, որ աշխարհում կա միայն մեկ երկիր, ուր չի արտահանվում Թուրքիայի արտադրանքը:
Ապա Չաղլայանը հստակեցրել է, որ այդ երկիրը խաղաղօվկիանոսյան Կիրիբատի փոքր կղզի պետությունն է: Չաղլայանը խոստացել է, որ մոտ ժամանակներս այդ բացը կլրացվի, և թուրքական ապրանքները կվաճառվեն նաև այդ երկրին:
Չաղլայանի խոսքերով՝ նախորդ տարի թուրքական արտահանման ծավալը ռեկորդային է եղել հանրապետության պատմության ընթացքում: Չաղլայանը հիշեցրել է, որ իշխող «Արդարություն և զարգացում» կուսակցության (ԱԶԿ) կառավարման ժամանակաշրջանում (2002 թվականից) մեկ շնչին բաժին ընկնող ազգային եկամտի ցուցանիշը 3500 դոլարից հասցվել է 10,444 դոլարի, իսկ 2023 թվականին դա պետք է կազմի 25,000 դոլար:
