Ինչպես հայտնում է La Figaro-ն, Ֆրանսիայի Սահմանադրական ժողովը հունվարի 28-ին օրինական է համարել միասեռականների ամուսնությունների արգելքը` այն համապատասխանեցնելով քաղաքացիական օրենսդրությանը, որտեղ ամուսնությունը մեկնաբանվում է իբրև տղամարդու և կնոջ միջև միասնություն:
Միասեռականների ամուսնությունների արգելքի դեմ դատարանում պայքարում էր մի զույգ, որը կազմված էր երկու կանանցից` Քորին Սեստինոյից և Սոֆի Ասլաուերից, որոնք 2004թ.-ին Բելգիայում ամուսնացել էին:
Նրանք արդեն 15 տարի է միասին են ապրում և մեծացնում են 4 երեխա, որոնցից երեքը լույս աշխարհ են եկել արհեստական բեղմնավորմամբ:
Միասեռական ընտանիքը ցանկանում էր ապացուցել, որ իրավունք ունի ամուսնության պաշտոնական վերականգնման, որը չեղյալ էր հայտարարվել ֆրանսիական իշխանությունների կողմից:
Միասեռական ամուսնությունների մասին հետագա որոշումը Սահմանադրական ժողովը հանձնել է իրավագետներին, որոնք իրավունք ունեն փոփոխություններ մտցնել օրենքի մեջ:
Դրանով իսկ, ինչպես նշում է La Figaro-ն, այս հարցի քննարկումն ու որոշումը պետք է կայացնեն քաղաքական գործիչները և, ամենայն հավանականությամբ, այն կլինի 2012 թ.-ի նախագահական ընտրությունների քննարկման գլխավոր թեման:
Նշվում է, որ վերջին 5 տարիների ընթացքում Ֆրանսիայում միասեռական ընտանիքների հանդեպ վերաբերմունքը փոխվել է դեպի լավը:
Ինչպես ցույց են տալիս TNS-ի հարցումները, 2006 թ.-ին միասեռական ամուսնություններին կողմ էին ֆրանսիացիների 45%-ը, դեմ` հարցվածների 51%-ը:
Ներկա պահին միասեռական ամուսնությունների թույլատրմանը կողմ է ֆրանսիացիների 51%-ը, դեմ` ընդամենը 35%-ը: Բացի այդ, ֆրանսիացիների 49%-ը կողմ է, որ հոմոսեքսուալ զույգերին իրավունք տրվի երեխա որդեգրել:
Այսպես կոչված, միասեռական ամուսնությունները Ֆրանսիայում թույլատրված են 1999 թ.-ից, սակայն այդ զույգերն, ի տարբերություն նորմալ զույգերի, ունեն իրավական սահմանափակումներ:
Միասեռական ամուսնությունները թույլատրվում են Բելգիայում, Նիդեռլանդներում, Նորվեգիայում, Շվեյցարիայում և Իսպանիայում: Բացի այդ, միասեռականները կարող են ձևակերպել իրենց հարաբերությունները Արգենտինայում, Կանադայում և ամերիկյան մայրցամաքի մի շարք այլ երկրներում:
