«Հայաստանի և Ադրբեջանի միջև պատերազմի վերսկսման դեպքում Եվրամիությունը չի սկսի ազգային ինքնորոշման կամ տարածքային ամբողջականության մասին աբստրակտ քննարկումներ, այլ ուղղակի կքննադատի հրադադարի ռեժիմի խախտման պատասխանատուներին», 1news.az-ի հետ զրույցում ասել է Բրյուսելի Բաց համալասարանի պրոֆեսոր Բրունո Կոպիտերսը:
Միևնույն ժամանակ, նրա կարծիքով, վերը նշվածը չի նշանակում, որ կոնֆլիկտի գոտում ներկայիս իրավիճակն ընդունելի է ԵՄ համար, քանի որ նման իրավիճակը հնարավորություն չի տալիս շտկել այն անարդարությունները, որ տեղի են ունեցել պատրեազմի ընթացքում, հատկապես խաղաղ քաղաքացիական բնակչության նկատմամբ: Կոպիտերսը գտնում է, որ նոր պատերազմը էլ ավելի կխորացնի այդ անարդարությունները և կբարդացնի բանակցային գործընթացը:
Անդրադառնալով եվրոպական հասարակության տեղեկացվածությանը հարավային կոնֆլիկտներին` քաղաքագետն ասել է, որ միայն 2008 թ. ռուս-վրացական հակամարտությունից հետո են դրանք սկսել եվրոպական լրատվական հոսքերում առաջնային դիրքեր զբաղեցնել: Իսկ այժմ նման հետաքրքրությունը կարող է կտրուկ աճել, եթե մասնավորապես ղարաբաղյան հակամարտության կարգավորման գործընթացում կտրուկ առաջընթաց արձանագրվի կամ պատերազմի ռեալ սպառնալիք լինի, ինչը կարող է ավելի խոշոր տերությունների ներգրավվածության բերել: