Երևանի ժամանակով 18:00-ին, երբ Եգիպտոսում դեռ նոր էր որոշում ընդունվում հայտարարելու պարետային ժամի մասին, Եգիպտոսի պետական հեռուստաընկերությունը տեղեկացրեց, որ քիչ անց կլինի նախագահ Հոսնի Մոբարաքի ուղերձը Եգիպտոսի ժողովրդին: Սակայն արդեն անցել է մոտ յոթ ժամ, բայց Մուբարաքը դեռ ելույթ չի ունեցել: Որոշ վերլուծաբաններ նույնիսկ հայտարարում են, որ նա այլևս Եգիպտոսում չէ: Քիչ առաջ Al-Jazeera-ն տեղեկացրեց, որ որոշ լուրերի համաձայն Եգիպտոսի հայտնի գործարարները և քաղաքական գործիչները լքել են Եգիպտոսը:
Դրա վառ ապացույցն էլ այն է, որ թեպետ բանակը մտցվել է երկրի մայրաքաղաք Կահիրե, սակայն այն չի միջամտում բողոքի ակցիաներին: Ավելին, շատ զինվորականներ ողջագուրվում են ցուցարարաների հետ` բացականչելով «Կեցցե՛ Եգիպտոսը»: Սա կարող է վկայել միայն մի բանի մասին. ավտորիտար այս իշխանությունը չէր կարող իրեն այսպիսի շռայլություն թույլ տալ, այն է` բանակի միջոցով ճնշել այս ցասումը: Եթե իրավիճակը գտնվում է քաղաքացիների վեահսկողության տակ, ապա Մուբարաքի իշխանությունը փլուզման եզրին է: Այն, որ ԱՄՆ նախագահի խոսնակն էլ հայտարարում է, որ Օբաման չի պատրաստվում խոսել Մուբարաքի հետ, շատ բանի մասին է ասում:
Ինչ էլ որ լինի մինչև առավոտ, այս պահին հստակ կարելի է ասել` Եգիպտոսն ու տարածաշրջանը շատ արագ փոփոխվում են, իսկ քաղաքական համակարգում տեղի են ունենում տեկտոնական փոփոխություններ: Ակնհայտ է, որ եթե Մուբարաքը մնա իշխանության, ինչը գրեթե անհնար է այսօրվա ելույթներից և, հատկապես, իրավապահների տապալումից հետո, եգիպտական հասարակությունը դժվար է լինելու կառավարել այն մեթոդներով, որոնք գործի էին դրված նախորդ երեսուն և ավելի տարիների ընթացքում: Հատկապես տեխնոլոգիական զարգացման այս փոլում, երբ ինֆորմացիոն հոսքերն իրենց ճանապարհին քարը քարի վրա չեն թողնում, Եգիպտոսի, ինչպես նաև տարածաշրջանային մյուս ռեժիմները պետք է փոխեն իրենց երկրների քաղաքական համակարգերը:
Այս պահին համեմատաբար հանգիստ է Կահիրեում և եգիպտական մյուս քաղաքներում: «Առաջին լրատվականը» տեղեկացրել էր, որ վտանգ կար, որ իշխող Ազգային ժողովրդավարական կուսակցության հրկիզումից հետո կրակը կարող էր տարածվել հարակից շինությունների վրա, այդ թվում` աշխարհահռչակ Ազգային թանգարանի, որտեղ գտնվում են փարավոնների գանձերը: Ինչպես հաղորդում է Al-Jazeera հեռուստաընկերությունը, իրավիճակը վերահսկվում է զինվորականների և քաղաքացիների կողմից: Հրդեհի վտանգ չկա, իսկ թանգարանները թալանից փրկելու համար նրանք միահամուռ ուժերով հսկողություն են իրականացնում թանգարանների շենքերում: Կահիրեի և մյուս քաղաքների տարբեր շրջաններում կողոպուտի դեպքեր են գրանցվել:
Այս պահին լրատվամիջոցները հայտնում են 11 զոհի մասին: Հիվանդանոցներում ծանր վիճակում են գտնվում ավելի քան 30 մարդ, իսկ վիրավորների թիվն անցնում է 1,000-ից:
Մենք հետևում ենք իրադարձությունների զարգացմանը և փոփոխությունների դեպքում մեր ընթերցողը դրանց մասին կիմանա առաջինը:
