«Առաջին լրատվականն» արդեն տեղեկացրել է, որ տասնյակ հազարավոր մարդիկ Եգիպտոսի տարբեր քաղաքներում դուրս են եկել փողոցներ և պահանջում են գործող իշխանության հրաժարականը` նախագահ Հոսնի Մուբարաքի գլխավորությամբ: Այս պահին արդեն հայտնի է երեք զոհի մասին: Իշխող Ազգային ժողովրդավարական կուսակցությունը հայտարարել է, որ Ահմեդ Նազիֆի կառավարությունը պետք է հրաժարական տա, քանի որ այն չի իրականացնում իշխող կուսակցության ծրագիրը:
Al-Jazeera հեռուստաընկերությունը փոխանցում է, որ Սուեզ քաղաքում ցուցարարները գրավել են տեղի ոստիկանությունը և ազատել վերջին մի քանի օրերին ձերբակալված բոլոր ցուցարարներին: Ցուցարարներից շատերը հայտարարում են, որ «տեսակի պայքար է» գնում Հոսնի Մուբարաքի իշխանության հետ: Vesti.ru-ն հայտնում է, որ Իսմայիլիյա քաղաքում հավաքվածները գրոհ են կազմակերպել իշխող Ազգային-ժողովրդավարական կուսակցության գրասենյակների վրա: Ըստ ITAR-TASS-ի` Ալ-Մանսուր քաղաքում ավելի քան 40 հազար ցուցարարներ գրավել են այդ կուսակցության շենքը:
Al-Jazeera հեռուստաընկերության ուղիղ եթերում ցուցադրում են, թե ինչպես են հազարավոր մարդիկ բախումների մեջ մտնում իրավապահների հետ, այրվում են մեքենաներ, լսվում են կրակոցներ: Հեռուստաընկերության լրագրողը հայտնում է, որ Ալեքսանդրիա քաղաքում դեպքեր կան, երբ ոստիկաններն անցնում են ցուցարարների կողմը` հայտարարելով, որ իրենք բոլորը եգիպտացիներ են և միասին են: Al-Jazeera-ն հայտնում է, որ Ալեքսանդրիայի ոստիկանությունը հրաժարվում է գրոհել ցուցարարների վրա:
Al-Misr Al-Youm-ը տեղեկացնում է, որ ավելի քան 20 հազար մարդ գրավել են Նեղոսի վրայով անցնող կարևորագույն կամուրջը, ոստիկանությունը չի կարողանում նրանց ցրել այդ վայրից: Ցուցարարները, ոգևորված թունիսյան վերջին դեպքերից, երգում են Թունիսի պետական հիմնը: Ընդդիմադիր առանձին առաջնորդներ քաղաքացիական հագուստով երիտասարդների կողմից հարձակումների են ենթարկվում: Բոլորն ասում են, որ դրանք հատուկ ծառայությունների ներկայացուցիչներ են, որոնք փորձում են կասեցնել ընդդիմության առաջնորդների մասնակցությունն այսօրվա բողոքի հանրահավաքներին և երթերին:
