Էրդողանն ուզում է Թուրքիայում երկկուսակցական համակարգ ստեղծել

Հինգշաբթի օրը Aksam թերթը գրել է, որ Թուրքիայի վարչապետ և «Արդարություն և զարգացում» կուսակցության (ԱԶԿ) առաջնորդ Ռեջեփ Թայիփ Էրդողանը հանդես է եկել խորհրդարանը երկկուսակցական դարձնելու առաջարկությամբ` համարելով այն ավելի արդյունավետ:
Ներկայումս Թուրքիայում գործում է բազմակուսակցական համակարգը, և խորհրդարան կարող են մտնել այն կուսակցությունները, որոնք կհաղթահարեն 10 տոկոսի արգելքը:
«Ես կարծում եմ, որ երկկուսակցական համակարգը դրական է, քանի որ դրա պարագայում խորհրդարանն ավելի արդյունավետ է գործում և ապահովվում է կառավարման կայունությունը»,- ասել է Էրդողանը՝ պատասխանելով Aksam-ի հարցերին:
Որպես օրինակ նա բերել է ԱՄՆ-ն` հավելելով, որ երկկուսակցական համակարգը թույլ է տալիս շատ օրինագծեր ավելի արագ ընդունել:
Էրդողանն այս հայտարարությունն անում է Թուրքիայում գալիք հունիսին տեղի ունենալիք խորհրդարանական ընտրություններից առաջ:
Aksam-ը դրա հետ կապված հիշեցնում է վարչապետի երկու այլ հայտարարություն ևս, որոնք առնչվում են ընտրություններին: Նա, մասնավորապես, հանդես է եկել ընտրվելու շեմը իջեցնելու նախաձեռնությամբ, ինչը համառորեն պնդում էր ընդդիմությունը, և հայտնել է, որ միակուսակցական կառավարությունը կարող է ապահովել երկրի տնտեսական կայունությունը:
Վերջին սոցիոլոգիական հարցումների արդյունքով, եթե ընտրությունները լինեին այսօր, Էրդողանի կուսակցությունը կհավաքեր 46 տոկոսը և նորից կկանգներ իշխանության ղեկին: