Մենք փոքր ենք, մենք քիչ ենք, բայց մենք ոգով հաղթել ենք: Եվ լավ է, երբ ոգուն հավասարազոր գնա նաև այն, ինչ պետք է նորմալ բանակի համար: Այսինքն՝ նորմալ սպառազինություն: Այս մասին մեզ հետ զրույցում ասաց երգչուհի Շուշան Պետրոսյանը, որը տարիներ շարունակ համերգային շրջագայություններով միշտ այցելում է զինվորներին։ «Իմ և զինվորների սերը փոխադարձ է: Եթե հիմնվենք ձեռքբերումների` պատերազմի և հաղթանակների վրա, մեր բանակը իրականում ոգու բանակ է: Իսկ իմ երազանքների բանակը բարձր գիտակցության և ոգու տեր բանակն է»,- ընդգծեց Շուշան Պետրոսյանը:
Մեր այն հարցին, թե այսօրվա բանակը համապատասխանո՞ւմ է իր երազանքների բանակին, Շուշան Պետրոսյանը պատասխանեց. «Անցյալ տարվա իմ վերջին այցին,- իսկ վերջին անգամ նոյեմբերին եմ եղել Քելբաջարում,- պետք է ասեմ, որ պատկերն ինձ շատ ուրախացրեց: Չնայած, չգիտես ինչու, լրագրողները միայն վատն են խոսում: Բայց այնքան բաներ կային, այնպես կուզեի, որ մի օր այդ լավ բաների մասին էլ գրվեր, իսկ այդ լավ բաները ես տեսել, լսել եմ: Պատմել չեմ կարող, որովհետև այդ ամենին պետք է ականտես լինել»:
